Entra roubar nunha casa en Salceda e rompe varios ósos ao fuxir polo balcón

A Garda Civil de Pontevedra detivo un home como presunto autor dun roubo nunha vivenda do municipio de Salceda de Caselas. Ao tratar de fuxir polo balcón, rompeu varios ósos e tivo que ser trasladado en ambulancia ao Hospital Álvaro Cunqueiro de Vigo.

Segundo informa o instituto armado nun comunicado, os feitos producíronse sobre as 22:00 horas do pasado domingo cando unha patrulla se trasladou ao lugar dos feitos tras recibir o aviso de que unha persoa caera do balcón dunha casa.

Unha vez no punto, os axentes comprobaron que na beirarrúa había un home, maior de idade e estranxeiro, sen poder moverse. De acordo co relato do dono da vivenda, cando volveu esa noite, atopou o bombín da porta traseira roto.

Dentroi escoitoi balbordo xa que no interior se atopaban, polo menos, dúas persoas. Unha delas escapou pola parte traseira, mentres outra saltou desde o balcón do primeiro andar.

Debido á caída, o home rompeu varios ósos e tivo que ser trasladado en ambulancia ao Hospital Álvaro Cunqueiro de Vigo en calidade de detido como presunto autor dun delito de roubo con forza en vivenda en grao de tentativa.

Os axentes identificaron o home e comprobaron que é residente en Murcia, ten antecedentes policiais, así como unha requisitoria xudicial de procura, detención e comparecencia.

O detido, que só se pode mover en padiola debido ás súas lesións, pasou á disposición xudicial este martes no Xulgado de Garda do Porriño, onde foi trasladado nunha ambulancia escoltada por unha patrulla da Garda Civil.

O home foi posto en liberdade e regresou en ambulancia ao centro hospitalario, pendente de comparecer no xulgado cando sexa requirido.