Detido veciño de Ourense por presuntas estafas vinculadas a produtos de investimento e seguros por máis de 325.000 euros

A Garda Civil de Ourense detivo un veciño da localidade como presunto autor dun delito de estafa vinculado a supostos produtos de investimento e seguros con máis de 325.000 euros de prexuízo patrimonial.

Segundo informou a Comandancia a través dun comunicado, a investigación iniciouse a partir de varias denuncias que permitiron detectar un modus operandi baseado en xerar unha relación de confianza cos clientes e unha aparencia profesional vinculada á actividade aseguradora.

Neste caso, os prexudicados realizarían achegas económicas para presuntos depósitos ou produtos financeiros con rendibilidades que oscilaban aproximadamente entre o 3,95 % e o 7,40 % anual. O prexuízo patrimonial ascende a máis de 325.000 euros vinculado aos diferentes afectados e operacións investigadas.

Así, a investigación, que permanece aberta e non descarta a posible existencia de novas persoas prexudicadas, tamén apuntou ao presunto uso de documentación aparentemente falsa para proporcionar unha aparencia de lexitimidade ás operacións.

Casos investigados

Tal e como explicaron, no principal caso investigado fixéronse achegas durante varios anos a través de diferentes transferencias bancarias. Cando un dos afectados solicitou o rescate dunha cantidade superior a 46.000 euros, recibiu varios xustificantes de transferencias que posteriormente non resultarían efectivos.

Así, tras realizar comprobacións ante as entidades relacionadas cos presuntos produtos, determinouse que non constaban os depósitos ou achegas comunicados ás persoas prexudicadas.

Nesta liña, noutros feitos investigados, cobraríanse en efectivo ou por transferencias cantidades correspondentes a primas de seguros e entregaríanse despois xustificantes ou documentas que acreditaba aparentemente a contratación.

Con todo, tras comprobar coas compañías aseguradoras, detectouse que determinadas pólizas non foran correctamente formalizadas, de tal forma que algúns afectados tiveron coñecemento da situación cando recibiron comunicacións das súas respectivas aseguradoras.