As lapas calcinan "o niño da aguia", antiga residencia de Hitler nos Alpes

Un home foi detido no sur de Alemaña despois do incendio, posiblemente deliberado, do chalé de Kehlsteinhaus, coñecido popularmente como "o niño da aguia" de Adolf Hitler e que era utilizado polos xerarcas nazis para recibir invitados estranxeiros.

Segundo comunicou este sábado a policía de Baviera, o venres pola noite desatouse un incendio que levou a que a edificación, situada nun pico dos Alpes bávaros, fora pasto dunhas chamas que aínda non foron apagadas por completo, pero nas que, segundo informacións preliminares, ninguén resultou ferido.

"Unha persoa sospeitosa foi detida de forma provisional. A Policía Criminal de Traunstein asumiu as investigacións sobre a causa do incendio", indicou a policía de Baviera Superior Sur nun breve comunicado.

A primeira alerta chegou o venres pola noite cara ás 21:15 hora local, pero o difícil acceso ao chalé dificultou os labores de apagamento, que por este motivo aínda continúan, coa participación ata o momento duns 200 operativos.

Nos vídeos difundidos nos medios pódese ver como as chamas engolen por completo o edificio.

"Está en gran parte danado. Non parece que a casa se vaia poder salvar", declarou un portavoz da policía ao tabloide Bild con respecto ao futuro do lugar, sen aventurar cal podería ser o motivo do posible incendio deliberado.

O chalé, completado en 1938 e situado a 1.834 metros de altura, serviu a Hitler como lugar de recibimento de diplomáticos ou outros invitados estranxeiros, aínda que non está confirmado o rumor de que fora un agasallo de aniversario recibido polo ditador con motivo do seu 5 aniversario.

Desde 1952 funcionaba como restaurante e albergue de montaña estival e estaba catalogado como patrimonio histórico, como parte da cultura do recordo dos crimes do nazismo, sobre cuxa historia acollía unha exposición permanente.