Un xulgado do Porriño abre dilixencias sobre un chat en que policías compartían datos
Trátase dun grupo de Telegram formado por ata 300 axentes (locais, nacionais e gardas civís) da provincia de Pontevedra e do que terían constancia mandos policiais
No chat compartirían datos e informes confidenciais sen supervisión oficial entre os anos 2020 e 2026
Europa Press-Arquivo
O Tribunal de Instancia do Porriño abriu dilixencias xudiciais para investigar un grupo de chat de Telegram en que policías da provincia de Pontevedra, supostamente, compartían datos e informes confidenciais.
A causa, segundo confirmaron a EFE fontes xudiciais, foi declarada baixo segredo de sumario pola xuíza instrutora.
As actuacións xudiciais súmanse ás dilixencias que, segundo revelou a web The Objective, iniciou a Fiscalía de Vigo tras a denuncia dun inspector sobre a canle de Telegram cuns 300 policías e do que mandos policiais terían constancia.
A Fiscalía investigou ese chat por revelación de segredos, omisión do deber de perseguir delitos e infidelidade na custodia de documentos.
Segundo o mesmo medio, o chat 'Alerta Policial Pontevedra' inclúe a uns 300 axentes entre policías nacionais, gardas civís e policías locais que compartirían datos e informes confidenciais sen supervisión oficial entre 2020 e 2026.
