Un ferido leve nun escape de gas nunha vivenda en Santiago
A deflagación da bombona dun soprete de cociña cando o manipulaba causoulle a un mozo queimaduras leves en cara, mans e pés
A explosión da bombona dun soprete de cociña deixou unha persoa ferida nunha vivenda en Santiago.
O inquilino do apartamento en cuestión alertou os servizos de emerxencia arredor das sete da mañá deste luns no barrio de Vista Alegre. Ata o punto se desprazaron dotacións de bombeiros, da Policía Local, da Policía Nacional e unha ambulancia asistencial.
O home contou que estaba preparando o almorzo cando un fuga de gas procedente da bombona estourou e comezou a arder. Ademais, o lume propagouse polas botellas de aceite que estaban no mesado da cociña e a fumarada invadiu varias estancias da vivenda.
Como consecuencia do incendio, o home quedou ferido con queimaduras leves na cara, nas mans e nos pés. Foi atendido polos sanitarios no lugar e non precisou traslado a un centro hospitalario.
Fontes municipais confirmaron que o lume rematou con danos significativos na cociña, pero non tivo maior afectación no edificio e non se produxiron desaloxos.
