Un home de 64 anos falece nun accidente de tráfico en Santiago
Ocorreu na estrada que une Sigüeiro co aeroporto compostelán
Nun tramo recto da estrada que enlaza o aeroporto de Santiago con Sigüeiro foi onde tivo lugar o accidente mortal. O coche, un Ford Fiesta, circulaba a noite pasada en sentido Sigüeiro e, por causas que se descoñecen, invadiu o carril contrario e saíu do asfalto.
Polo terraplén aínda percorreu unhas ducias de metros en que foi batendo cos postes do pretil ata que acabou envorcando no fondo do desnivel.
"Ás 9:25 tivemos coñecemento do sinistro viario acontecido na AC-250, entre A Lavacolla e Sigüeiro, á altura do punto quilométrico 5,100. Foi unha saída da vía pola marxe esquerda e envorcado. Como consecuencia do sinistro, falece o condutor e único ocupante, veciño de Frades, de 64 anos de idade", precisa o brigada Cerqueiras, do destacamento da Garda Civil de Tráfico de Santiago.
O accidente tivo lugar a uns dous quilómetros da casa do falecido, no termo municipal de Santiago. Pola mañá, no lugar do sinistro non se apreciaba ningunha pegada de freada e a Garda Civil de Tráfico investiga as circunstancias do mesmo.
Entre os profesionais de urxencias desprazados ao lugar tras o sinistro foron bombeiros para sacar a vítima de debaixo do coche. Todo apunta a que o home non levaba o cinto de seguridade posto. O cadáver trasladárono ao hospital de Conxo para realizarlle a autopsia.
