Seis feridos nunha colisión brutal entre dous coches en Redondela
Os feridos, dous deles menores, foron trasladados ao hospital Álvaro Cunqueiro e ao hospital Fátima de Vigo
O accidente produciuse este sábado pola noite e a vía permaneceu cortada mentres non se puideron retirar os vehículos
O accidente produciuse no quilómetro 145 da estrada nacional N-550, ao seu paso pola parroquia de Quintela. No accidente quedaron feridas seis persoas, dúas delas son menores. Todos foron hospitalizados con feridas de diferente consideración.
Emerxencias 112 de Galicia e mais a Policía Local de Redondela recibiron o aviso, a última hora do sábado pola noite, de que os ocupantes de dous vehículos accidentados estaba atrapados. Un dos coches, un Jeep Renegade, tiña cinco ocupantes dentro e estaba envorcado no medio da calzada. O outro coche era un Peugeot 309 e nel viaxaba só a condutora, que tamén estaba atrapada no seu interior.
A Garda Civil de Tráfico de Vilaboa e O Porriño, dúas ambulancias medicalizadas do 061 e unha asistencial desprazáronse axiña ao lugar do accidente. Tamen o fixeron rapidamente o GES de Mos e O Porriño e Protección Civil de Redondela.
Liberados os ocupantes dos vehículos, foron trasladados a dous hospitais de Vigo, o Álvaro Cunqueiro e Fátima.
A estrada N-550 permaneceu cortada mentres non se puideron retirar os coches e foi precisa tamén a intervención do equipo de conservación de estrada, para limpar a vía.
