Un equipo de mozas e mozos ourensáns representa Galicia nun certame internacional de robótica

Un grupo de oito rapaces e rapazas de Ourense van representar Galicia no maior certame mundial de competición de robótica educativa e innovación. 

A súa solución innovadora para mellorar a comunicación dos mergulladores na exploración oceánica conseguiu ser o terceiro mellor na competición da Liga de Lego. 

Desde outubro estiveron traballando nestes proxectos de robótica educativa e innovación que os levará a representar Galicia nun evento en Sydney, Australia. 

Ademais de adquirir os coñecementos para a programación, o deseño e a construción de robots e solucións tecnolóxicas comparten valores como o compañeirismo, a humildade a honestidade e o traballo en equipo. 

"Que entendan que as cousas ás veces funcionan e outras non, que hai que traballar a longo prazo e que non todo é para xa, iso é o máis importante. E que sexan creativos, capaces de achegar solucións", asegura Cristina Fernéndez Mangana, adestradora do equipo Captioma Elementals. 

"Non é só un traballo en equipo, tamén amizade, sobre todo", di Marta, unhas das rapazas do grupo. 

"Aquí en Captioma aprendemos moito, pero non só de robótica, porque estamos moitas horas todos xuntos", apunta Atenea, outra integrante do equipo.