Estupor na Coruña pola posible implicación da Matavellas na morte dunha anciá

Sorpresa e dor no barrio de Monelos pola morte violenta dunha veciña de 91 anos: "Era unha persoa moi boa, por iso a enganaron", di a veciñanza

Á vítima atopouna sen vida, tirada no chan do cuarto de baño, un neto seu que se achegou á vivenda porque non lle contestaba ao teléfono. Tras alertar os seus, chamaron o 061 e, na primeira valoración médica, non detectaron sinais de violencia e a morte foi considerada natural. Porén, máis tarde, cando os fillos da anciá revisaron as gravacións dunha cámara que había na vivenda, viron que a falecida estaba acompañada dunha muller.

E isto foi o que precipitou unha nova liña de investigación. Esa muller é, presuntamente, Remedios Sánchez, que está a cumprir no cárcere de Teixeiro unha condena de 144 anos por asasinar tres mulleres en Cataluña no 2006. Gañaba a confianza das vítimas para atacalas e roubarlles cartos que gastaba en xogos de azar. A fin de semana do 3 de outubro, cando faleceu a anciá da Coruña, estaba de permiso penitenciario.

A autopsia revelou lesións compatibles cunha morte violenta por asfixia e varias fracturas. As dilixencias policiais son secretas.