Un ciberataque "paraliza" o funcionamento do Concello de Sanxenxo: piden 5.000 dólares en bitcoins
O 'malware' desencadeou foi unha encriptación masiva dos documentos que manexa a administración local e para arranxalo demandouse un pago de 5.000 dólares en bitcoins. O Concello non accedeu ao desembolso e interpuxo denuncia ante a Garda Civil.
As empresas municipais Nauta e Turismo de Sanxenxo non están afectadas polo virus porque dispoñen dunha rede diferente ás do Concello. A sede electrónica funcionou tamén con normalidade.
Imaxe de arquivo de ciberataque (EUROPAPRESS)
Un ataque informático ao servidor paralizou o funcionamento do Concello de Sanxenxo (Pontevedra), segundo informou o propio goberno municipal.
Nun comunicado, explica que foi esta mañá cando se tivo coñecemento da entrada na rede municipal dun 'malware', termo que designa un tipo de software furtivo, cuxo propósito é danar o mecanismo no que se infiltra paralizando os equipos da Casa do concello.
O que o 'malware' desencadeou foi unha encriptación masiva dos documentos que manexa a administración local. Unha vez consumado o ataque, os operarios do Concello non podían acceder a miles de arquivos.
O paso seguinte cobrou a forma dunha extorsión virtual, xa que se demandou un pago de 5.000 dólares en bitcoins. O Concello non accedeu ao desembolso de diñeiro e interpuxo denuncia ante a Garda Civil.
Para solucionar os efectos do virus, os servizos técnicos e de seguridade recorreron á copia de seguridade que cada día replica o sistema informático do Concello. Deste xeito, prevese que nas próximas horas se resolva o problema.
As empresas municipais Nauta e Turismo de Sanxenxo non están afectadas polo virus porque dispoñen dunha rede diferente ás do Concello. A sede electrónica funcionou tamén con normalidade.
