Un carril da AG-53 segue cortado á espera da retirada do bus ardido en San Cristovo de Cea
Os 63 pasaxeiros que viaxaban no vehículo resultaron ilesos
Un carril da autovía AG-53, entre Dozón e Ourense, segue cortado á altura de San Cristovo de Cea, en dirección á capital ourensá, e alí peramecen os restos do autobús calcinado este domingo á tarde, á espera de que poidan ser retirados.
O suceso produciuse á altura do quilómetro 70, na parroquia de Lamas, pouco antes das seis da tarde. O omnibús, con 63 pasaxeiros a bordo, comezou a arder en marcha.
Todos os ocupantes foron evacuados antes de que o lume consumise por completo o vehículo, sen que houbese que lamentar danos persoais, e continuaron viaxe cara a Valladolid noutro autobús.
Durante un par de horas a autovía permaneceu cortada nese punto en dirección Ourense, e xa ás 20:30 restableceuse o tráfico polo carril esquerdo, situación que se mantén nas primeiras horas da mañá deste luns.
Ademais o suceso causou un incendio forestal na mesma parroquia que se deu por estabilizado pouco tempo despois.
