Un bus lanzadeira Baiona-Vigo para mellor a conectividade do Val Miñor
Un bus lanzadeira unirá por autoestrada Baiona coa intermodal de Vigo e os hospitais con 32 frecuencias diarias
Redeseño do servizo de transporte público no Val Miñor con novas liñas tamén polas dúas estradas convencionais
Outra liña conectará Baiona e Gondomar co campus universitario de Vigo
En Baiona hai descontento co servizo do transporte público actual
"Iso teñen que solucionalo, porque é un auténtico desastre, non sabes nin cando chega un autobús nin cando sae".
"Van sobrecargados, a xente de pé", lamentan varios usuarios do transporte público.
Para paliar este descontento a Xunta vai reorganizar o transporte con dúas liñas directas por autoestrada entre Baiona e Vigo, unha delas con paradas nos hospitais. O servizo será cada media hora en días laborables e de cada hora nas fins de semana e festivos e terá unha soa parada na Praia América.
"Paréceme ben, chegará antes a Vigo, non?".
"A min vénme estupendamente pero egoistamente mirando por min, porque vivo en Baiona pero que o que viva en Nigrán, en Salláns...", apuntan outros.
A Xunta confirma que haberá outras dúas liñas por estrada convencional. Unha pola PO-552 con servizos cada hora en días laborables e cada dúas en fin de semana. Outra pola costa con menos frecuencias no inverno pero reforzada nos meses de xullo e agosto.
A reestruturación completarase con outro bus que conectará os núcleos principais de Baiona e Gondomar co campus de Vigo para facilitar o acceso á universidade. O proxecto está en fase de tramitación de audiencia pública á espera de alegacións.
