Un buque do CSIC dispón dos medios necesarios para chegar ao Villa de Pitanxo

O principal buque oceanográfico do Consello Superior de Investigacións Científicas, o Sarmiento de Gamboa, podería ser clave no esclarecemento do naufraxio do Villa de Pitanxo. Iso é o que mantén un informe técnico realizado por unha consultoría marítima asturiana a petición das familias dos falecidos.

A clave estaría en que este buque leva a bordo robots que poden baixar a profundidades moi superiores ás que estaría afundido o arrastreiro, tal como recoñece o propio CSIC, que xa verificou o ademais o seu alcance:

"O Sarmiento de Gamboa é o primeiro buque oceanográfico español que pode traballar con ROV (vehículo operado por control remoto) de altas profundidades e con AUV (vehículo autónomo submariño)".

 "O vehículo ROV chega ata os 6.000 metros de profundidade e está preparado para recoller e transportar mostras dos fondos mariños."  

Os técnicos do Sarmiento de Gamboa presentaban algunhas destas incorporacións tecnolóxicas nunha estancia en Vigo, o seu porto base, no verán de 2019. En vista de que estes recursos xa existen e son de propiedade pública, o informe técnico solicitado polas familias recalca que localizar e inspeccionar o Villa de Pitanxo nos fondos mariños de Terra Nova non requiriría ningún despregamento excepcional de medios.

Polo momento, os familiares non van divulgar a totalidade do informe técnico, porque a súa finalidade é achegalo como un aval máis na iniciativa xudicial que manteñen para tentar que se esclarezan as causas do naufraxio.