Un boi de Culleredo bate o récord na Central Agropecuaria de Galicia ao ser poxado por 10.521 euros

A Central Agropecuaria de Galicia que se celebra en Silleda bateu a súa marca en prezo pagado por un exemplar na historia deste mercado: un boi que alcanza os 10.521 euros.

En concreto, trátase dun boi de raza Frisoa, nacido en xullo do ano 2022, e propiedade dunha explotación de Culleredo. Así, foi comprado por 10.521 euros por Frigoríficos Bandeira neste mercado, o único de vacún informatizado de España.

Con esta cifra supérase o boi que durante case dous anos ostentou o maior prezo alcanzado por un exemplar na Central, nesa ocasión era de raza mestiza e poxárase por 10.498 euros o 8 de outubro de 2024.