Os cultivos do agro sofren a seca recorrente
O millo reduciu a súa produción nalgunhas explotacións e tamén a pataca
Os especialistas apostan pola adaptación ao cambio climático, adiantando a sementeira e apostando por variedades tradicionais
Diversificar a produción con variedades tradicionais como o paínzo, a avea moura ou o centeo son algunhas das opcións fronte á seca
A seca e a calor deste verán, están repercutindo de xeito dispar nos cultivos do agro.
No caso da pataca, a falta de choivas afectou o medre das plantas e a produción, pero tamén evitou as pragas e mellorou a calidade.
Na uva, as altas temperaturas favoreceron producións históricas e obrigou a aidantar as vendimas.
Porén, o millo atopouse cunha situación dispar dependendo da variedade empregada, mais nalgunhas explotacións perderon ata un corenta por cento da producción.
"O millo quedou afectado porque na época máis sensible, que é a froración, había unha seca arrstrada de non chover en meses e temperaturas altas", confirma o científico da Misión Biolóxica de Galicia, Bernardo Ordás.
Na misión biolóxica de Galicia, en Pontevedra, estudan o impacto ambiental nas plantas e na súa produción. Por iso, diante da situación do cambio climático, co aumento das temperaturas e da duración das secas, apostan por unha adaptación progresiva aos cambios.
"Os tempos que había antes cómpre adaptalos un pouco, que se está a facer, e co millo hai que sementar antes. Hai que buscar variedades que resisten mellor a seca, como as variedades tradicionais que levan aquí toda a vida e que adoitan ser moi rústicas, e tamén diversificar os cultivos", asegura Bernardo Ordás, investigador da Misión Biolóxica de Galicia que depende do Consello Superior de Investigacións Científicas (CSIC).
Os investigadores apuntan a cultivos coma o paínzo, o centeo ou a avea moura como alternativas pola súa resistencia á seca e polo seu arraigamento en Galicia. Mentres tanto os produtores continúan pendentes da evolución da seca de cara aos cultivos de outono e inverno.
"Agora mesmo demandan moito tema de grelos e horta. Si que é verdade que na tenda non hai moito movemento, non sei se é polo tema do tempo", conta Rubén Mirás dende a tenda Farmagra en Santiago de Compostela.
Nabizas, grelos e produtos de horta dependen da volta das choivas e do frío xa que, de non teren as condicións ideais, poderán ver afectada a súa produción e sabor. Polo momento, nalgunhas zonas houbo que retrasar a semente por falla de precipitacións.
