Un ataque a un hospital do Sudán deixa 64 mortos

Un ataque ao Hospital Universitario da cidade sudanesa de Al Deain, capital do estado de Darfur Oriental, causou o venres pola noite polo menos 64 mortos, entre eles 13 nenos, segundo denunciou a Organización Mundial da Saúde (OMS).

O ataque deixou 89 feridos, entre eles oito traballadores sanitarios, e danou os servizos de pediatría, maternidade e urxencias do hospital, que deixou de estar operativo, segundo denunciou o director xeneral da OMS, Tedros Adhanom Ghebreyesus, na súa conta oficial en X.

.@WHO has verified yet another attack on health care in #Sudan. This time, Al Deain Teaching Hospital in East Darfur’s capital, Al Deain, was struck, killing at least 64 people, including 13 children, two female nurses, one male doctor, and multiple patients.

As a result of this… pic.twitter.com/RAwDR5YVjd

— Tedros Adhanom Ghebreyesus (@DrTedros) March 21, 2026

Na guerra civil sudanesa, iniciada hai case tres anos, a OMS contabilizou polo menos 213 ataques contra instalacións sanitarias ou traballadores do sector, nos que morreron 2.036 persoas e 720 quedaron feridas. O dereito internacional considera que os ataques a hospitais e outras infraestruturas civís poden constituír crimes de guerra.

"Máis aló do devastador custo humano, os ataques contra a atención sanitaria teñen consecuencias inmediatas e a longo prazo para comunidades que xa antes necesitaban desesperadamente tanto servizos médicos de emerxencia como atención rutineira. É o momento de rebaixar a escalada do conflito en Sudán e garantir a protección de civís, traballadores sanitarios e persoal humanitario", subliñou o director xeral da OMS, quen insistiu en que "a atención sanitaria nunca debería ser un obxectivo".

O grupo de dereitos sudanés Emergency Lawyers, informou de que foi un ataque do exército o que alcanzou o hospital.