Un apagamento masivo afecta Praga e varias cidades checas por un fallo nunha subestación

Un terzo de Praga, a capital checa, e outras cidades do país sufriron un corte na subministración eléctrica debido a un fallo nunha subestación, que provocou a caída do servizo de metro e de varias liñas de tranvía.

O apagamento produciuse cara ao mediodía e afectou principalmente á capital e ao norte do país, onde cidades como Liberec, a quinta máis poboada, tamén quedaron sen subministración.

A compañía eléctrica Pražská energetika (Praga Enerxía) sinalou pola súa banda que a subministración quedará totalmente restablecida pronto.

Esta empresa indicou que o corte afectou a un terzo da cidade de Praga e tivo a súa orixe na subestación de Chodov, a uns 10 quilómetros ao sueste da capital.

O operador da rede eléctrica ČEPS anunciou que, en total, oito subestacións, das 44 que hai no país, sufriron unha caída da subministración debida a unha caída nun condutor de fase.

O alcalde de Praga, Bohuslav Svoboda, indicou que o corte non se debeu a un problema na rede de distribución da cidade senón a "un grave problema no sistema de transmisión da República Checa".

Apuntou tamén a que unha interrupción no sistema na subestación de Chodov, e na próxima de Malešice, orixinou a caída da subministración, sinala Radio Praga.

As autoridades descartaron unha hora despois do apagamento que a causa do mesmo estivese relacionada cun atentado terrorista. Analistas expertos no sistema eléctrico, citados polos medios, estiman que se produciu un repentino descenso do 30 % na carga da rede.

Gran parte do transporte público en Praga quedou paralizado, tanto liñas de metro como de tranvía, e o bombeiros tiveron que intervir para rescatar persoas atrapadas en ascensores. Tamén se interrompeu o servizo de trens entre Praga e Kolín, Benešov e Kutná Hora.