Turespaña di que as accións no Hostal dos Reis Católicos respectaron “criterios técnicos”

O Instituto de Turismo de España, Turespaña, organismo autónomo dependente do Ministerio de Industria e Turismo, defendeu as obras realizadas no Parador de Turismo de Santiago de Compostela, o Hostal dos Reis Católicos, ao subliñar que “as actuacións se desenvolveron en todo momento conforme ao Plan Director, respectando os criterios técnicos establecidos e contando coa aprobación dos órganos competentes en materia de patrimonio”.

A execución das obras no Hostal dos Reis Católicos xerou importantes críticas pola intervención nas gárgolas deste inmoble catalogado como ben de interese cultural (BIC).

Tras iso, a Xunta de Galicia avanzou que se reunirá esta semana co arquitecto responsable da rehabilitación a fin de analizar a posibilidade de buscar unha "fórmula mellor” que os tubos que se colocaron para “solucionar os problemas de humidades” que afectaban o Hostal, posto que a evacuación das augas das gárgolas renacentistas non funcionaba correctamente e, polo tanto, caía auga sobre o balcón, de época barroca.

Desde Turespaña insisten en que a relevancia patrimonial do Hostal que “constitúe un dos inmobles máis emblemáticos da rede”, motivou que conte co primeiro Plan Director de Conservación dun Parador de Turismo, que foi aprobado en 2022 pola Xunta de Galicia e que establece as directrices para todas as intervencións no edificio.

Neste sentido, nun comunicado, o organismo reitera que as actuacións impulsadas por Turespaña desenvolvéronse en todo momento conforme este Plan Director, respectando os criterios técnicos establecidos e contando coa aprobación dos órganos competentes en materia de patrimonio.

Apuntan que o investimento total neste parador ascende a 14 millóns de euros, e contemplan a limpeza de elementos pétreos, a mellora da súa conservación fronte á humidade, a recuperación de espazos históricos e a súa posta en valor para o visitante.

O equipo redactor e dirección facultativa do proxecto está dirixido por Fernando Cobos, redactor tamén do Plan Director de Conservación e conta cun equipo multidisciplinar de especialistas como arqueólogos e restauradores que desenvolven as solucións do proxecto.

Neste caso e tal e como sucede en “todos os proxectos de conservación en patrimonio cultural”, as distintas opcións e solucións do proxecto son “froito dun rigoroso estudo por parte dos seus responsables que contempla a conservación a futuro, a compatibilidade de materiais e a mínima intervención, aliñados cos estándares nacionais e internacionais en materia de conservación, reforzando a súa calidade e solvencia”.

A Xunta ve "un rexeitamento máis que xustificado" á solución técnica

A solución técnica adoptada nas gárgolas do Hostal dos Reis Católicos motivou, segundo a Xunta, "un rexeitamento máis que xustificado".

Así o manifestou este mércores en declaracións aos xornalistas o conselleiro de Cultura, José López Campos, quen, por outra banda, puxo en valor o traballo técnico no seu conxunto do arquitecto director da obra de rehabilitación do emblemático edificio e do equipo encargado da intervención.

"Creo que é claro e rotundo que hai un rexeitamento máis que xustificado á solución técnica adoptada, e como o propio informe recollía hai que analizar pormenorizadamente cales son as solucións que se van adoptar", afirmou o conselleiro.

López Campos lembrou que "non debemos obviar cal é o problema fundamental que está detrás desta cuestión, que é un problema moito maior que o estético, como é a filtración das augas no edificio", precisou.

Considerou que "nestes tempos hai solucións adecuadas que permiten compatibilizar esa parte máis funcional coa parte estética", e aí é onde o titular de Cultura dixo que traballarán os técnicos da Dirección Xeral de Patrimonio e do Ministerio, responsable de executar estas actuacións, "para tratar de atopar a solución máis adecuada".

Neste sentido, indicou que a intervención realizada nas gárgolas non causou "ningún dano estrutural irreparable", de forma que calquera actuación que se faga a partir de agora "é facilmente emendable e o que temos que atopar é a mellor solución".

A Xunta trasladou por escrito ao Ministerio a proposta dunha reunión a nivel técnico para tratar de achar unha solución "adecuada" e "idónea" para as gárgolas do Hostal dos Reis Católicos e trasladoulle a súa "colaboración total e absoluta".