Trump advirte a Hamás que "non tolerará demoras" que entorpezan a paz en Gaza
Nunha mensaxe en redes o presidente dos EUA tamén lle agradeceu a Israel o cesamento temporal dos ataques aéreos sobre a Franxa
Familias palestinas desprazadas nun campamento en Mawasi. REUTERS/Ramadan Abed
O presidente dos Estados Unidos, Donald Trump, advertiulle este sábado a Hamás que "non tolerará demoras" que poidan poñer en perigo o acordo de paz en Gaza impulsado pola Casa Branca.
Do mesmo xeito, agradeceulle a Israel o cesamento temporal dos ataques aéreos sobre a Franxa.
"Agradezo que Israel detivera temporalmente os bombardeos para dar a oportunidade de concretar a liberación de reféns e o acordo de paz. Hamás debe actuar con rapidez; pola contra, todo se perderá. Non tolerarei demoras, como moitos cren que ocorrerá", escribiu Trump na súa rede Truth Social.
O mandatario insistiu en que non aceptará "ningún resultado no que Gaza volva representar unha ameaza" para a paz rexional.
"Fagamos isto, RÁPIDO! Todos recibirán un trato xusto!", prometeu.
Trump celebrou este venres que Hamás aceptara liberar os reféns israelís que mantén na Franxa baixo os termos expresados no plan que impulsa para o enclave palestino, e pediulle a Israel que parase os bombardeos sobre Gaza.
Plan de 20 puntos
O plan de 20 puntos que o presidente presentou este luns na Casa Branca, aceptado polo primeiro ministro israelí, Benjamín Netanyahu, propón o fin inmediato da guerra, a liberación dos reféns e a formación dun goberno de transición para Gaza, supervisado polo mandatario estadounidense e o ex primeiro ministro británico Tony Blair.
A proposta tamén contempla a desmilitarización da Franxa e a posibilidade de negociar no futuro un Estado palestino, algo descartado, con todo, polo primeiro ministro israelí.
A Casa Branca confirmou que o enviado especial de Trump para Oriente Próximo, Steve Witkoff, viaxa este sábado ao Cairo para avanzar as negociacións sobre o plan de paz antes da súa posta en funcionamento.
Primeira comparecencia de Netanyahu
O primeiro ministro israelí, Benjamín Netanyahu, afirmou este sábado que o seu Goberno está a piques de "conseguir un gran logro" e confiou en que nos próximos días se poida anunciar a liberación de todos os reféns en mans de Hamás.
"Espero, se Deus quere, que nos próximos días, durante a festividade de Sucot (festa xudía que se celebra entre o 7 e o 14 de outubro), poida anunciarlles o regreso de todos os nosos secuestrados, tanto vivos como mortos", dixo Netanyahu nun vídeo difundido polo seu gabinete na noite deste sábado.
Trátase da súa primeira comparecencia desde o anuncio de Hamás.
