O movemento de Cidadáns Descontentos, de Andrej Babbis, gaña as eleccións na República Checa
Podería formar goberno en coalición coa dereita antieuropeísta e prorrusa do SPD
Partía como favorito e superou as enquisas co 35% dos votos
O movemento de Cidadáns Descontentos (ANO), do magnate agroindustrial e populista Andrej Babis, gañou as eleccións lexislativas celebradas na República Checa co 35% dos votos, escrutado o 98%. Conseguiu adiantar a alianza de centrodereita liberal Spolu (Xuntos), do actual primeiro ministro, Petr Fiala, que obtivo un 23%.
Babis chega ao poder cun programa eurocrítico, antiinmigración e reticente a seguir armando Ucraína. O novo vencedor, que recupera o poder despois de catro anos, declárase abertamente "trumpista", afín ás posicións prorrusas do goberno húngaro de Viktor Órban, e prometeu xestionar o Estado "como unha empresa".
En xullo de 2024 foi un dos fundadores do grupo Patriotas por Europa no Parlamento Europeo, impulsado por Orban e no que se encadran os partidos de extrema dereita, incluído Vox. Con esta vitoria fortalécese o bloque prorruso do leste de Europa.
Podería formar goberno coa ultradereita prorrusa do SPD
Con preto do 90% das papeletas escrutadas, o partido do magnate e exprimeiro ministro Babis obtén 85 dos 200 escanos no Parlamento, fronte aos 50 deputados da alianza de centro liberal do xefe de Goberno en funcións. Con este resultado, Babis podería formar goberno co respaldo da ultradereita prorrusa do SPD, liderado polo checo-xaponés Tomio Okamura, que conseguiu o 8% dos votos. Ante os seus seguidores avanzou que negociará con esta formación e tamén con Motoristé, para acadar a maioría necesaria.
