Triplo parto dunha vaca, todo un acontecemento en Monfero
Os trixemelgos encheron de sorpresa e ledicia unha propiedade rural
As tres crías gozan de saúde
Pastora, Morena e Marelo son os trixemelgos que agora loitan por saíren adiante.
"De momento non queren o biberón. Aliméntanse co que chupan eles. Supoño que cando teñan máis fame xa collerán o biberón", comenta Juan Freijomil.
Morena, súa nai, púxose de parto o Xoves Santo, contra as sete da tarde. Canda ela estaba Juan, que aos seus case 91 anos, alí estaba para axudala.
"Non saía e axudei cunha corda. Despois vin que saía outra pata. E cando xa estaban os dous cuxos fóra, marchei", di Juan.
"Eu ía axudar, pero xa vin que non lle facía falta e din a volta", explica Angélica Mosquera.
Marcharon para a casa. Ao día seguinte, Juan volveu á corte para ver como estaban os cuxos, e cal foi a súa sorpresa ao descubrir que había un máis...
"Quedei... E porque non tiña ningunha outra vaca preñada, senón pensaría que era da outra", engade Juan.
Juan e Angélica non contaban con este acontecemento, porque o veterinario dixéralles que co touro que teñen non ían ter crías porque, o ano pasado, o picara un becho.
"Chamei ao veterinario e díxenlle: se lle chegan a picar dous bechos, trae seis xatos. El moito riu", lembra Angélica.
Un episodio ben curioso que xa queda como unha fermosa anécdota en Monfero.
