Tres vehículos quedaron calcinados polo incendio dun garaxe en Ourense

Tres coches calcinados en dúas horas. É o balance dun incendio nunha vivenda unifamiliar das aforas de Ourense. Foi a menor da familia, unha moza de dezaoito anos, a primeira en percibir o cheiro.

"Sobre as catro da madrugada avisoume a miña filla porque cheiraba mal e había estoupidos. Baixei ao garaxe e vin que había moito fume e lume detrás dun dos vehículos", explica o fillo dos propietarios.

O fillo dos propietarios, que vive na mesma casa, intentou sufocar as primeiras lapas e mesmo tratou de sacar fóra un dos vehículos, un coche eléctrico que, segundo nos conta, era o máis afastado do lume; pero non había luz nin auga: "Foi o último que ardeu dos tres. Intentei sacalo, pero como non había luz non o podía desconectar. Ademais, non se daba respirado".

Cando chegaron os bombeiros, o lume xa estaba estendido por todo o garaxe, un baixo de escasa altura no que se alcanzou unha temperatura moi elevada. Polo momento descoñecen as causas do incendio, pero confirman que a batería do Tesla non sufriu danos.

César Pichel, xefe do Servizo de Extinción de Ourense: "Este vehículo eléctrico está nunha das esquinas. A batería non ardeu, senón non estariamos aquí agora. Aparentemente é o menos afectado, pero non se pode descartar ningunha opción aínda. Un incendio nunha batería pode levar dous días. Son longos de apagar".

A familia pasou a noite na casa dun veciño e de momento non poden regresar porque a estrutura quedou danada.

"Isto está por debaixo dunha terraza, cunha estrutura metálica que coa temperatura cedeu nalgún piar. Estamos coordinándonos para manter cando menos as medidas mínimas de seguridade", explica o xefe dos Bombeiros.

Os bombeiros retiráronse ás seis da mañá, pero tiveron que regresar contra as nove porque se reavivaron as lapas.