Tres persoas quedaron feridas, unha delas grave, nun accidente en Ponteareas

O estado en que quedou o vehículo tras o sinistro cando circulaba por unha estrada na parroquia de Padróns, en Ponteareas, dá conta da gravidade do accidente. O coche saíu da vía e caeu por un terraplén ata bater cunha árbore. O impacto deixou o vehículo totalmente esnaquizado e fixo saltar o motor, que se desprazou ata uns cinco metros de distancia. 

Ata a zona desprazáronse os servizos de emerxencia e os bombeiros, que tiveron que liberar un dos ocupantes: unha moza de dezaoito anos que quedou atrapada dentro do coche en estado inconsciente. 

Os tres ocupantes quedaron feridos e tiveron que ser trasladados a un centro hospitalario. A moza que tivo que ser rescatada do interior do vehículo continúa ingresada e permanece estable.