Fin de semana de sol e praia en Galicia
As boas temperaturas sitúan os areais galegos como principal destino desde este venres ata o domingo
Ata semella que agradecen as retinas estes azuis brillantes que este ano se fixeron tanto de rogar. Así que, con medio mes de maio fóra, case que ninguén quere perder a oportunidade de aproveitar o bo tempo que nos acompañará toda a fin de semana.
Pasaba moi pouco das once da mañá cando comezaron a chegar os bañistas á praia de Cabío. Había gana, porque para moitos son aínda a primeira oportunidade de tomar un pouquiño de vitamina D. A boa noticia é que ademais xa hai bares de praia abertos, enchendo os barrís de cervexa e o caderno das reservas.
"Empeza a parecer potente, xa temos moitas reservas para comer, porque ademais, co festivo das letras galegas, moita xente non traballa o sábado", conta Yessika Castro, responsable do bar Lombiña.
