Trens ateigados en Galicia na segunda fin de semana de abono gratuíto

Renfe aumenta en 14.000 prazas a oferta nos servizos de Media Distancia do Eixo Atlántico e os Avant. A pesar diso as estacións galegas de tren rexistraron unha grande afluencia de viaxeiros nesta segunda fin de semana de uso do abono gratuíto.

As prazas que se ofrecen a maiores beneficiarán a todos aqueles viaxeiros que se despracen entre A Coruña, Santiago de Compostela, Pontevedra e Vigo (e estacións intermedias destes percorridos) e aos usuarios dos trens Avant entre A Coruña, Santiago de Compostela e Ourense.

Na liña entre A Coruña e Ourense, Renfe ofrecerá máis de 1.900 prazas de incremento respecto ao verán, o que supón un incremento do 9% nun día laborable medio.

Segundo o operador ferroviario, ofreceranse máis prazas denominadas "sinerxiadas", que son prazas en trens de longa distancia onde se pode viaxar con tarifa de Avant.