Trasladan en helicóptero en estado grave un traballador que caeu dunha estada en Boiro
O operario, de 61 anos, caeu a un patio interior e quedou inconsciente
Arquivo
Un home de 61 anos tivo que se trasladado en helicóptero ao Hospital Clínico Universitario de Santiago tras resultar ferido grave ao caer desde unha estada a un patio interior no municipio coruñés de Boiro.
Segundo a información do 112 Galicia, o suceso produciuse sobre as 16.00 horas deste venres na rúa Estatuto de Galicia e foi un particular o que deu a voz de alarma e avisou de que o ferido estaba inconsciente.
Ata o punto desprazáronse os profesionais de Urxencias Sanitarias de Galicia-061 que mobilizaron o helicóptero medicalizado, unha ambulancia e persoal sanitario do PAC de Boiro. Os bombeiros empregaron unha padiola para levar ata a ambulancia o ferido, que permanecía inconsciente e que finalmente foi evacuado en helicóptero ao Hospital Clínico de Santiago.
No operativo tamén participaron a Garda Civil, os Bombeiros de Boiro, a Policía Local e Protección Civil.
