Trasladan en helicóptero ao hospital a unha muller cunha parada cardíaca nunha praia de Oleiros

Unha muller tivo que ser trasladada este luns de urxencia ao hospital nun helicóptero medicalizado tras sufrir unha parada cardiorrespiratoria mentres se bañaba na Praia de Mera, no Concello de Oleiros.

O suceso produciuse pasadas as cinco da tarde, momento no que o servizo de atención a emerxencias 112 Galicia recibiu varias chamadas alertando desta situación e dunha primeira intervención por parte dos socorristas do areal tratando de reanimar á afectada, que finalmente foi levada en estado consciente ao centro hospitalario.

Outras incidencias en Barreiros e Foz 

Non foi esta a única incidencia dunha tarde de altas temperaturas en Galicia que requiriu múltiples intervencións en diferentes puntos por parte dos equipos de emerxencias.

En San Pedro de Benquerencia, no concello lugués de Barreiros, tres persoas e un can tiveron que ser rescatadas polos socorristas despois de quedarse illadas nunha praia tras a subida da marea, ao redor das dúas da tarde.

Nun punto próximo, en Foz, os socorristas tamén sacaron da auga a unha persoa inconsciente na praia da Rapadoira, a cal foi posteriormente trasladada ao hospital por profesionais de urxencias sanitarias.

Feridos pai e fillo facendo sendeirismo en Viveiro

Tamén na costa da Mariña, en Viveiro, un pai e o seu fillo foron rescatados tras precipitarse por un desnivel de aproximadamente dous metros mentres realizaban un roteiro de sendeirismo pola zona coñecida como Pozo da Ferida.

Como consecuencia do incidente sufriron algúns golpes e arañazos e, aínda que non revestían maior gravidade, foron levados por precaución ao hospital máis próximo para unha valoración e un seguimento máis exhaustivos.