Tractoristas volven cortar a A-52 ao seu paso por Xinzo e insisten en reunirse cun cargo do Ministerio

Gandeiros e agricultores de Ourense volveron cortar a autovía A-52, nos dous sentidos, ao seu paso por Xinzo de Limia para esixir de novo unha reunión cun cargo do Ministerio de Agricultura, Pesca e Alimentación en relación co acordo con Mercosur.

Segundo confirmou a Garda Civil da provincia, ambos sentidos da autovía permanecen cortados desde a tarde deste xoves no punto quilométrico 190,5.

O voceiro dos tractoristas e gandeiro de Maceda, Miguel Gómez, reiterou que manterán o bloqueo da vía ata lograr unha reunión con algún alto cargo do Ministerio.

Tras máis dun mes de protestas na provincia, os manifestantes abandonaron na mañá deste xoves, arredor das 11:00 horas, o polígono industrial de San Cibrao das Viñas, onde permanecían concentrados desde o pasado venres.

Segundo explicou Gómez, pararon para comer, agocharon os tractores en naves e puxéronse de acordo para saír de novo á estrada.

Finalmente mobilizaron máis de 100 tractores de distintos municipios e chegaron á autovía arredor das 15:00 horas.

O voceiro dos tractoristas denunciou que levan máis dun mes mobilizados e que seguen, ao seu xuízo, sen obter respostas ás súas demandas.

Nese sentido, insistiu na necesidade dunha reunión con representantes do Ministerio que dirixe Luis Planas.

Entre as principais reivindicacións manteñen o cumprimento da Lei da Cadea Alimentaria, a apertura urxente da vacinación contra a dermatose nodular e o seu rexeitamento ao acordo europeo con Mercosur.

Trátase da segunda vez que gandeiros e agricultores de Ourense bloquean a A-52, despois de que a comezos de xaneiro trasladaran os seus tractores a esta vía na contorna do quilómetro 188.

Máis de 25.000 agricultores e gandeiros e 15.000 tractores mobilízanse en toda España 

E en todo o país, máis de 25.000 agricultores e gandeiros e uns 15.000 tractores tomaron este xoves rúas e estradas no denominado súper xoves do campo, con 29 mobilizacións simultáneas en protesta polos recortes da futura Política Agrícola Común e polo acordo comercial entre a Unión Europea e Mercosur.

As organizacións agrarias convocantes explican que as protestas buscan reivindicar a supervivencia do medio rural e denunciar unha situación que consideran crítica para o sector.

Desde o norte ao sur do país, incluídas as illas Canarias e Baleares, agricultores e gandeiros expresaron o seu malestar con pancartas e consignas en defensa do sector.

Entre as mensaxes máis repetidas figuraron lemas como a defensa da unidade do campo, o rexeitamento ao acordo con Mercosur e a advertencia sobre as consecuencias destas políticas para o futuro do rural.