Traballan sen descanso para recuperar a normalidade nas zonas máis afectadas polas treboadas

En Viana do Bolo seguen co medo no corpo pola riada que lles levou dúas aldeas por diante. Os veciños están esgotados tras o acontecido, pero seguen traballando para limpar.

En Pradocabalos hai puntos que seguen anegados, pero a boa noticia é que os veciños volven ter auga e luz.

Os veciños de Pradocabalos apenas descansan dende o pasado mércores. Unha treboada rebordou o río Bouzas e levouno todo por diante. 

A imaxe non é diferente na Bouza. No centro da aldea amoreábanse os cascallos e algunha vivenda ten bloqueda a entrada. Os operarios da Deputación traballan para liberar a estrada cara a Viana, que quedara bloqueada polas pedras.

Os veciños coidan que o peor xa pasou, pero din que precisan axuda para volver á normalidade.

Moitas das árbores queimadas nos incendios do ano pasado baixaron polo monte e bloquearon camiños ata chegar a algunhas pontes de Pradocabalos, onde traballaban esta mañá.

Os socialistas galegos instan a Xunta a activar o plan de emerxencia en Viana do Bolo. José Ramón Gómez Besteiro cualificou de dantesca a situación e vincula a magnitude dos danos co estado dos montes tras os incendios do verán pasado.

Zona catastrófica

O alcalde de Viana (Ourense) pide a declaración de zona catastrófica: "Isto é un tsumani, todo arrasado", asegurou en declaracións aos medios Germán García-Ávila, que sostivo que na súa localidade se dan "de libro" as circunstancias para que esta declaración sexa aprobada polas administracións competentes.

Así mesmo, indicou que a Deputación de Ourense e a Xunta están a traballar na zona e hai xente sen auga nin luz á que o Concello levou auga potable e que se traballa para restablecer a subministración.

Pola súa banda, consultada por Europa Press, a alcaldesa de Vilamartín de Valdeorras, Sherezade Núñez Rodríguez explicou que no seu municipio hai danos moi cuantiosos, como calzadas e baixos alagados, e que haberá veciños "con moitos problemas", aínda que non se chegaron a destruír vivendas.

A rexedora explicou que este mesmo xoves desprazouse á zona o conselleiro de Presidencia, Diego Calvo, quen lles trasladou que unha vez feita a valoración dos danos analizaranse as axudas para poñer en marcha.

Entre os principais problemas na localidade está a falta de auga potable en moitos dos puntos despois de que, conforme explicou Sherezade Núñez, quedasen sen subministración ao quedar "catapultadas as captacións".