A Xunta pide celeridade para pechar a transferencia de permisos de traballo a estranxeiros

O conselleiro de Presidencia Diego Calvo pediu este mércores ao Goberno que acelere a transferencia das autorizacións iniciais de permisos de traballo para estranxeiros, un traspaso que pactaran que ía ser moito máis rápido e sobre o que non existía ningún problema, sinalou. Segundo Calvo, a primeira proposta que trasladou o Goberno sobre a valoración de medios e persoal era ridícula, e por iso a rexeitou a Xunta.

O conselleiro explicou que escribiu de novo ao ministro responsable, Ángel Víctor Torres, para acelerar o proceso, e o seu departamento contestoulles que ao longo desta semana ou a próxima trasladarán á Xunta unha nova valoración técnica.

Se é satisfactoria, pecharase o traspaso da transferencia e, se non o é, advertiu, o Goberno galego volverá pedir unha reunión técnica para contrastar o custo real do traspaso e esixir os medios necesarios para desenvolver a competencia.

"Estamos de acordo en pedir unha transferencia sempre e cando sexa beneficioso para Galicia. Éo se podemos prestar en mellores condicións e dar mellor servizo e se se transfire cos medios adecuados", sinalou Calvo.

En setembro de 2025, o propio Diego Calvo reuniuse en Santiago co daquela secretario de Estado de Política Territorial Arcadi España, actual ministro de Facenda, e anunciaron que a partir de outubro dese ano comezarían as reunións técnicas para avanzar no traspaso a Galicia das competencias sobre aeródromos non esenciais e de tramitación de permiso de traballo a estranxeiros.

Naquela reunión ambos coincidiron na conveniencia do traspaso destas competencias e mostraron a súa vontade de poder pechar o acordo canto antes.