Piden o cese dun asesor da Deputación de Pontevedra por un vídeo de TikTok
Explicou que o vídeo, que subiu a súa muller a redes sociais, ten tres meses, e forma parte dun trend -ou tendencia- de humor que se fixo viral por TikTok
Ricardo Rubio / Europa Press
O PSOE e o BNG esixiron este venres a dimisión do xefe de gabinete do vicepresidente da Deputación de Pontevedra, Rafa Domínguez, tras a difusión dun vídeo no que chancea sobre golpear cun pau de golf a nenos orfos.
No vídeo, difundido a través da rede social TikTok, Álvaro Rodiño afirma que "trataría de apuntar á cabeza ou a órganos vitais", movendo o pau de golf coma se dese o golpe.
O propio Rodiño explicou que o vídeo, que subiu a súa muller a redes sociais, ten tres meses e forma parte dun trend -ou tendencia- de humor que se fixo viral por TikTok.
Este tipo de contido consiste en gravar a alguén respondendo a unha pregunta e, na montaxe, substituíla por outra diferente, en ocasións absurda ou politicamente incorrecta.
"Creo que o vídeo deixa claro o ton de broma, mesmo pola miña reacción e polo meu xeito de rirme. Dito isto, entendo perfectamente que, ao sacar uns segundos dese contexto e velos de xeito illado, alguén poida interpretalos doutro modo", afirma o aludido.
O que máis lle preocupa, engade Rodiño, "é que poida interpretarse que existe en min algún tipo de desprezo cara a un neno, cara a un orfo ou cara a unha persoa vulnerable", algo que asegura "está moi lonxe de como son e, sobre todo, de como entendo a vida".
Asegura en todo caso que "non vou negar que o vídeo poida resultar desafortunado nin que alguén poida interpretalo dun xeito diferente á intención coa que se fixo" e pide "sinceras desculpas" a quen puidese sentirse ferido ou ofendido.
Pero os socialistas reiteran que "non abonda con que se pidan escusas e se non dimite inmediatamente, deben botalo", como apuntou o seu portavoz na Deputación de Pontevedra, Laura Iglesias, que apunta estar "asqueada ata a náusea" por este vídeo.
"Alguén que se comporta deste xeito e que permita que a súa muller suba vídeos repugnantes deste tipo non merece cobrar nin un céntimo de diñeiro público", engadiu.
A esta petición sumouse tamén a expresidenta da Deputación de Pontevedra, a tamén socialista Carmela Silva; ou mesmo o ministro de Transportes, Óscar Puente.
O BNG, pola súa banda, considera que Rodiño é autor dunhas "afirmacións de odio totalmente inaceptables" para alguén que ostenta un "cargo da súa responsabilidade" no goberno provincial de Pontevedra.
