Tomé dá por rematada a crise aberta tras a ausencia de 3 deputados do pleno da Deputación de Lugo
A reunión dos membros do grupo provincial rematou, segundo relatou o presidente da institución, co "compromiso de non volver repetir ese feito insólito"
Tomé, tamén secretario provincial do PSdeG, desvincula a crise do proceso de primarias
O presidente da Deputación de Lugo, José Tomé, asegurou que a crise interna no PSOE provincial está resolta despois da ausencia de tres deputados socialistas no pleno do pasado martes, o que deixou o Goberno en minoría de forma puntual.
Tras unha reunión de dúas horas celebrada na tarde deste xoves, Tomé compareceu ante os medios e cualificou o encontro como “tranquilo, con moito debate e longo”. Segundo indicou, todos os asistentes coincidiron en que “o que pasou o outro día non tiña que pasar e non volverá suceder”.
Na xuntanza participaron nove dos dez deputados socialistas. O único ausente foi Francisco Cajoto, que tiña asemblea local para renovar a dirección en Foz, aínda que estivo en contacto permanente co resto do grupo.
Tomé recoñeceu que a ausencia dos tres deputados -Iván Castro, Marisol Morandeira e José María Arias, integrantes da lista alternativa nas primarias do partido- foi unha “situación insólita”, pero insistiu en que non ten relación directa co funcionamento da Deputación. “Hai compromiso de todos para que isto non volva pasar”, dixo, e salientou que os cargos públicos “deben estar nas institucións”.
Non haberá cambios na executiva nin medidas disciplinares
O presidente garantiu a continuidade do goberno provincial tal e como está, cos dez deputados socialistas e os tres do BNG. Afirmou que non haberá cambios nas atribucións nin tampouco sancións internas: “Non se pode sancionar á primeira vez”.
Entre os temas tratados na reunión estivo o remate do contrato dunha asesora que apoiara a lista de Iván Castro. Tomé aclarou que “se cumpriu o pactado o ano pasado, xa que o contrato remataba co mandato da executiva, e así foi”.
Sobre o fondo da crise, o presidente explicou que o problema foi unha “percepción de falta de comunicación” por parte dos deputados ausentes, unha visión que el non comparte. Con todo, comprometeuse a reforzar esas canles designando a portavoz do grupo, Pilar García Porto, como responsable de mellorar a coordinación interna.
Críticas ao PP polo seu comportamento no pleno
Tomé criticou o Partido Popular por non interesarse previamente polo motivo das ausencias e acusouno de “comportamento pouco exemplar”. Tamén o cualificou de “irresponsable” por votar en contra da apertura da residencia de Becerreá, un dos puntos clave da sesión plenaria.
O presidente confirmou que ese asunto volverá incluírse na orde do día da sesión de xullo. “A residencia vaise abrir”, concluíu.