O PPdeG frea a celebración dun pleno extraordinario sobre os incendios

A Deputación Permanente do Parlamento galego, o órgano de garda entre os diferentes períodos de sesións, rexeitou este venres, cos votos en contra do PPdeG, a solicitude do BNG e apoiada polo resto da oposición de convocar un pleno extraordinario sobre os incendios no que compareza o presidente da Xunta, Alfonso Rueda.

Con todo, a actividade ordinaria na Cámara arrinca o vindeiro luns, un de setembro, e a comparecencia do presidente galego está prevista para o primeiro pleno, que se celebrará na xornada do 9.

O portavoz do PP galego na Cámara, Alberto Pazos, defendeu a actuación da Xunta e do seu presidente que, ao seu xuízo, desde o primeiro momento estivo “na zona cero" dos incendios, “da man dos veciños” e “dando a cara sempre”.

Dixo que o debate non está “en se Rueda vai comparecer”, en tanto que xa rexistrou a súa solicitude para facelo a petición propia, pero rexeitan facelo baixo a premisa que urxe a oposición porque cre que "non queren xustiza", senón "un linchamento político”.

Fronte a iso, Luis Bará, viceportavoz do BNG, grupo impulsor da petición, cargou contra a “incoherencia” e “cinismo” dos populares en Galicia que mentres impiden “abrir o Parlamento”, urxen comparecencias no Senado a pesar de ser unha institución sen competencias en incendios.

O nacionalista reprochou que Rueda non acuda de maneira urxente á Cámara a pesar de ser o “máximo responsable” do “maior desastre económico, ecolóxico e social” en Galicia. 

Bará lamentou a “prepotencia, soberbia e propaganda” empregada polos populares a pesar de ser conscientes do “caos e colapso” do sistema contra incendios e de ademais ser os responsables de “non evitar” os incendios, xa que tiñan medios ao seu alcance para evitar as dimensións dos mesmos. Os incumprimentos e o deixamento da Xunta en materia forestal, dixo Bará, é unha das causas de que agora o dez por cento da provincia de Ourense estea arrasada polo lume.

Pola súa banda, o líder do PSdeG, José Ramón Gómez Besteiro, avanzou que os socialistas galegos pedirán unha comisión de seguimento do cumprimento da Xunta dos acordos en materia forestal emanados do ditame final da comisión creada tras a vaga de incendios de outubro de 2017. E explicou que consideran máis adecuada esta fórmula que a creación dunha comisión de investigación, ao entender que os populares sempre as converten “nun mero paripé”.

Ademais, observou que esa será a fórmula para medir a responsabilidade da Xunta na vaga de incendios e avanzou que, de feito, se se detectasen “neglixencias” por parte do Executivo galego, os socialistas non descartan “levar as conclusións á Fiscalía”. “A sociedade galega merece saber a verdade e esixir responsabilidades”, sinalou Besteiro, que cre que “a responsabilidade ten nomes e apelidos” e son os de Alfonso Rueda.

Durante a súa intervención, o secretario xeral do PSdeG repasou “os fallos” da xestión da Xunta e asegurou que no pico de incendios “non había os efectivos prometidos, nin o Pladiga funcionou como debía”, polo que os bombeiros e brigadistas tiveron que facer fronte ao lume “sen planificación nin medios suficientes”, xa que a Xunta deixou sen executar máis de 8 millóns de euros de fondos europeos para prevención.

Por último, Besteiro pediu altura de miras de fronte ao futuro porque “o que está en xogo non é unha batalla política, senón o futuro de Galicia”.

O único representante de Democracia Ourensana e deputado do grupo Mixto, Armando Ojea, apoiou a petición de comparecencia de Rueda ao entender que os incendios son un “motivo evidente” para facelo, xa que “por lóxica é quen máis información ten” sobre “que pasou e que teñen pensado facer”. “Unha vez que ata os Reis se dignaron a aparecer pola provincia de Ourense, o mínimo é que o presidente compareza”, sentenciou Ojea.