A Xunta aproba axudas directas para reconstruír as zonas afectadas pola vaga de incendios

O Consello extraordinario da Xunta, reunido en Ourense, acaba de aprobar un paquete de axudas directas para reconstruír as zonas afectadas polo lume. Haberá indemnizacións para os titulares de vivendas, granxas e outros centros produtivos, e tamén para instalacións e servizos municipais.afectados pola vaga de incendios deste verán que calcinou 96.500 hectáreas en 62 concellos galegos.

O presidente da Xunta, Alfonso Rueda, salientou que neste momento non hai ningún incendio activo en Galicia. Están estabilizados os focos da Pobra de Brollón e Avión e controlados outros nove que están xa en fase de extinción.

Con todo, Rueda recoñece que foi un verán moi duro. Só no mes de agosto rexistráronse 663 focos, que estragaron preto de 100.000 hectáreas de terreo. 144 vivendas sufriron danos; delas oito eran vivendas habituais e 42, segundas residencias. A elas hai que sumar estragos en explotacións agrogandeiras, empresas e infraestruturas públicas. Ademais, 400 persoas tiveron que ser evacuadas das súas vivendas e decretáronse 2.000 confinamentos

O presidente afirma que todos os afectados serán indemnizados. O Goberno galego non establece unha cifra global porque prefiren deixar "abertas as partidas".

As axudas publicaranse este sábado no Diario Oficial de Galicia e poderán solicitarse de forma inmediata desde o luns 1 de setembro. Segundo explicou Rueda "tentaremos ser o mais rápidos posible á hora de pagar as axudas".

Rueda enviou unha mensaxe de "ánimo" ás familias das tres persoas ingresadas en Galicia tras participar en labores de extinción. Trátase dun bombeiro de 18 anos que sofre queimaduras no 40 por cento do seu corpo. O seu prognóstico é grave. Tamén están graves, aínda que estables, o outro bombeiro de 26 con queimaduras de segundo grao no 15 % do corpo e o bombeiro forestal de 46 afectado polas lapas no 10 por cento do seu corpo.

O presidente confirmou que once persoas foron detidas en Galicia como presuntos responsables de prender incendios forestais.  Se se demostra a súa implicación nos mesmos, confía en que "todo o peso da lei" caia sobre eles.

Foi tras un Consello da Xunta Extraordinario celebrado en Ourense no que se aprobaron axudas para os damnificados pola vaga de incendios. Estas son as contías da axudas aprobadas polo Goberno galego que se poderán solicitar a partir do luns:

Indemnización por danos físicos nas persoas a causa dos incendios

As axudas contempladas no decreto están cifradas en 87.500 € en caso de falecemento ou incapacidade permanente absoluta e de 120 € por día de hospitalización no caso dos feridos. 

Axudas para a reconstrución das vivendas

Os propietarios de vivendas de uso habitual poderán percibir ata 132.000 € para a súa rehabilitación ou, en caso de que fose declarada ruinosa, poderán investir esta cantidade para a reconstrución do inmoble ou a compra dunha nova. A Xunta ofrece axudas de entre 7.600 e 16.200 € para renovar o mobiliario e demais útiles domésticos.

Os titulares de segundas ou terceiras residencias afectadas polo lume poderán optar a axudas de ata 66.000 € para a rehabilitación ou a adquisición dunha nova en caso de ser declarada en ruína. Haberá axudas de entre 3.300 e 5.400 € para repoñer o mobiliario, roupa e outros obxectos que houbese no interior.

Ademais, de xeito complementario, ofrécese un bono de alugueiro social que lles dará dereito a recibir ata o 100 % da renda de alugueiro e que irá acompañado dunha achega extra de 600 € para os gastos do aloxamento provisional ou o transporte e a mudanza.

Explotacións agrícolas, gandeiras e forestais

Os titulares das explotacións agrícolas e gandeiras afectadas polo lume poderán percibir ata 200.000 € para reparar bens, maquinaria ou equipos afectados ou mercar uns novos se quedaron inutilizados. Os que perdan total ou parcialmente a súa produción agrícola recibirán ata 75.000 €. Así, por exemplo, os titulares de viñedos recibirán achegas de 12.700 € por cada hectárea queimada; no caso da produción de castaña serán 1,22 €/ por quilo.

Haberá axudas dun máximo de 15.000 € para mercar alimentación complementaria para o gando en extensivo e as abellas. No caso das vacas, ofrécese un máximo de 1.600 € por animal maior o igual aos 18 meses.

Explotacións forestais

Para danos causados en infraestruturas privadas coma pistas forestais, cerramentos ou captacións augas, a Xunta ofrece axudas de ata 15.000 €/persoa. Para reparar a maquinaria danada ao colaborar nas tarefas de extinción dos lumes ou mercar unha nova se quedou inutilizada, ata 50.000 € por beneficiario.

As axudas para cubrir os gastos da madeira amoreada queimada ou a recollida da madeira ardida non comercial serán de ata 50.000 € e de ata 100.000 €/persoa para repoñer as forestacións executadas desde 2020.

Negocios

Os establecementos comerciais, industriais, turísticos e mercantís poderán pedir axudas de ata 600.000 € polos danos causados polo lume nas instalacións, na maquinaria, nas mercadorías ou nos vehículos.

Poderá chegar ao o millón e medio de euros de forma excepcional se son proxectos de grande impacto socioeconómico, como cando estean os empregos en perigo.

Concellos

A Xunta asinará convenios con cada concello afectado polas lapas, con importes variables en función dos danos rexistrados.

A maiores, os concellos poderán usar as achegas para resarcir os gastos que tiveran os veciños que participaron nas labores de extinción.

Tecores

Os terreos cinexeticamente ordenados que sufriran danos por mor dos incendios poderán optar a indemnizacións de ata 30.000 € por entidade para os gastos de sementeira de cereais (alimento á fauna silvestre e contribúen a restaurar os solos afectados).

As axudas serán de ata 12.000 € para reparar ou repoñer infraestruturas coma refuxios, fontes, bebedoiros e comedeiros para animais, etc.

Infraestruturas públicas situadas en espazos protexidos

A Xunta ofrece axudas para as infraestruturas de uso público situadas na rede galega de espazos protexidos ou nas reservas da biosfera.

Están dirixidas aos titulares dos espazos, tanto os concellos coma as comunidades de montes. Empregaranse para repoñer ou reformar miradoiros, sinais informativos, varandas de madeira ou área recreativas en espazos protexidos. 

Serán de ata 40.000 € no caso dos concellos e de 20.000 € para as mancomunidades de montes

Medidas administrativas

Xunto a estas axudas económicas, a Xunta adopta medidas administrativas dirixidas aos afectados pola vaga de incendios. Amplíanse os prazos para declaracións, autoliquidacións e documentación complementaria dos impostos que xestiona a Axencia Tributaria de Galicia e tamén para solicitar a prórroga da autoliquidación no imposto de sucesións.

Quedará exento de pago o canon da auga nas zonas afectadas e as taxas de calquera natureza que teñan que facer os afectados ante a Xunta. Ademais, as axudas recibidas non computarán para o IRPF.

A Xunta esixirá ao Goberno central que reduza ou exima o pagamento dos impostos, tal e como establece a Lei coa declaración de zonas catastróficas.

As axudas pódense solicitar desde o luns 

Desde o próximo luns os afectados pola vaga de incendios poden empezar a solicitar as axudas. Para tramitalas, a Xunta terá operativas 16 oficinas de atención dirixidas aos afectados. Medio cento de empregados públicos dedicaranse a xestionar coa máxima axilidade estas indemnizacións.

Os cidadáns poderán solicitar información relacionada con estas axudas no teléfono de información 012.

Medio Rural dá por controlados os grandes incendios que continúan ardendo en Galicia

 A Pobra do Brollón-Abrence: 900 ha

Ás 13.17 horas deste venres quedou controlado o incendio forestal do concello lucense da Pobra do Brollón, parroquia de Abrence, que se iniciou o pasado luns ás 13.06 horas. Segundo as últimas estimacións, afecta unha superficie de arredor de 900 hectáreas. Neste lume xa está desactivada, tamén, a Situación 2, medida adoptada de forma preventiva pola súa proximidade aos núcleos de Golmar, nesta mesma localidade; e nos de Conceado e San Pedro, xa no municipio veciño de Quiroga.

Para a súa extinción mobilizáronse de xeito acumulado 13 técnicos, 78 axentes, 82 brigadas, 67 motobombas, 5 pas, 9 helicópteros e 13 avións. Neste lume mobilizáronse efectivos da Unidade Militar de Emerxencias (UME).

Controlado Avión-Nieva: 250 ha

 

Ás 10.55 horas de hoxe quedou controlado o lume do concello ourensán de Avión, parroquia de Nieva, que se orixinou ás 17.09 horas do domingo día 24. Segundo as últimas estimacións, afecta unha superficie de arredor de 250 hectáreas.

Para a súa extinción mobilizáronse polo de agora, de xeito acumulado, 5 técnicos, 37 axentes, 71 brigadas, 42 motobombas, 5 pas, 10 helicópteros e 8 avións.

Controlado Oímbra-A Granxa e Xinzo de Limia-Gudín: 17.000 ha

Este incendio permanece controlado dende as 21.12 horas deste mércores, día 27. O martes 12 iniciouse no municipio ourensán de Oímbra, parroquia da Granxa, un lume que se uniu con outro rexistrado o pasado venres 15 ás 17.22 horas na localidade de Xinzo de Limia, Gudín. Segundo as últimas estimacións, este incendio afecta unha superficie estimada de 17.000 hectáreas, parte delas nos concellos de Monterrei, Cualedro, Verín, Laza, Trasmiras, Castrelo do Val e Baltar.

Para a súa extinción mobilizáronse, de xeito acumulado, 18 técnicos, 171 axentes, 234 brigadas, 151 motobombas, 6 pas, 8 unidades técnicas de apoio, 18 helicópteros e 34 avións. Neste lume mobilizáronse efectivos da Unidade Militar de Emerxencias (UME).

Controlado A Mezquita-A Esculqueira: 10.000

Segue controlado, dende as 21.12 horas do mércores, o incendio do concello da Mezquita, parroquia da Esculqueira, que se iniciou o martes 12 ás 21.20 horas. Segundo as últimas estimacións provisionais, afecta arredor de 10.000 hectáreas en territorio galego. Este lume afecta tamén aos municipios da Gudiña e Viana do Bolo; así como a territorio da provincia de Zamora.

Para a súa extinción mobilizáronse de xeito acumulado 8 técnicos, 53 axentes, 74 brigadas, 61 motobombas, 4 pas, 3 unidades técnicas de apoio, 11 helicópteros e 20 avións. Neste lume mobilizáronse efectivos da Unidade Militar de Emerxencias (UME). Tamén colaboraron nas tarefas de extinción medios terrestres portugueses.

Controlado Larouco-Seadur: 30.000 ha

 

Desde as 22.01 horas deste mércores, día 27, está controlado o incendio iniciado o mércores día 13 ás 18.55 horas no concello ourensán de Larouco, parroquia de Seadur, que afecta unha superficie estimada de máis de 30.000 hectáreas en territorio galego, no propio concello de Larouco e nos de Quiroga, O Barco de Valdeorras, O Bolo, Carballeda de Valdeorras, A Rúa, Petín, Rubiá, A Veiga e Vilamartín de Valdeorras.

Para a súa extinción mobilizáronse, de xeito acumulado, 54 técnicos, 245 axentes, 322 brigadas, 255 motobombas, 12 pas, 6 unidades técnicas de apoio, 15 helicópteros e 15 avións. Neste lume mobilizáronse efectivos da Unidade Militar de Emerxencias (UME).

Controlado Chandrexa de Queixa e estabilizado Vilariño de Conso-Mormentelos: 19.000 ha

Desde as 21.37 horas deste mércores están controlados os focos de Chandrexa de Queixa (Requeixo e Parafita), mentres que o de Vilariño de Conso (Mormentelos) mantense estabilizado desde as 13.01 horas do luns día 25. Os incendios comezaron en Chandrexa o venres 8, na parroquia de Requeixo, e o martes 12 na de Parafita. O xoves 14, reactivouse o foco do concello de Vilariño de Conso, parroquia de Mormentelos. Segundo as últimas estimacións provisionais, o lume afecta unha superficie de arredor de 19.000 hectáreas, parte delas tamén nos municipios de Manzaneda, Montederramo, A Pobra de Trives, O Bolo e Laza.

Para a súa extinción mobilizáronse de xeito acumulado, 23 técnicos, 186 axentes, 235 brigadas, 135 motobombas, 21 pas, 17 unidades técnicas de apoio, 34 helicópteros e 30 avións. Neste lume mobilizáronse efectivos da Unidade Militar de Emerxencias (UME).

Controlado Montederramo-Paredes: 120 ha

Segue controlado desde as 22.05 horas do venres, día 22, o incendio forestal do concello ourensán de Montederramo, parroquia de Paredes, que se iniciou o luns 11 ás 04.50 horas e que segundo as últimas estimacións afecta arredor de 120 hectáreas.

Para a súa extinción mobilizáronse, de xeito acumulado, 2 técnicos, 6 axentes, 14 brigadas, 12 motobombas, 2 pas, 2 unidades técnicas de apoio, 7 helicópteros e 7 avións.

Controlado Maceda (Santiso e Castro de Escuadro): 3.500 ha

O domingo 10 e o martes 12 comezaron dous incendios forestais no concello ourensán de Maceda, nas parroquias de Castro Escuadro e Santiso, respectivamente. Ambos acabaron por unirse nun só lume que quedou controlado ás 19.52 horas do venres día 22. Segundo as últimas estimacións provisionais, este incendio afecta en conxunto unha superficie de arredor de 3.500 hectáreas, parte delas do municipio de Vilar de Barrio.

Para a súa extinción mobilizáronse de xeito acumulado 11 técnicos, 101 axentes, 157 brigadas, 88 motobombas, 11 pas, 3 unidades técnicas de apoio, 19 helicópteros e 18 avións. Neste lume mobilizáronse efectivos da Unidade Militar de Emerxencias (UME).

Os incendios de Carballeda de Avia, Casaio e Vilardevós están extinguidos

Extinguido Carballeda de Avia-Vilar de Condes e Beade-As Regadas: 3.296 ha

O venres día 15 ás 16.38 horas iniciábase o incendio forestal do concello ourensán de Carballeda de Avia, parroquia de Vilar de Condes. Ese mesmo día, ás 18.16 rexistrouse outro na localidade ourensá de Beade, parroquia de As Regadas. Os dous lumes uníronse nun só, que quedou extinguido ás 20.18 horas de hoxe. Finalmente este incendio afectou unha superficie de 3.296,14 hectáreas das cales 2.036 se corresponden con monte raso e as 1.260,14 restantes con arborado, parte delas nos municipios de Avión, Melón, Leiro e Ribadavia.

Mobilizáronse para a súa extinción, de xeito acumulado, 6 técnicos, 117 axentes, 201 brigadas, 112 motobombas, 4 pas, 2 unidades técnicas de apoio, 10 helicópteros e 12 avións.

Extinguido Carballeda de Valdeorras-Casaio: 5.300 ha

Ás 20.16 horas de hoxe quedou extinguido o incendio do concello ourensán de Carballeda de Valdeorras, parroquia de Casaio, que comezaba ás 18.42 horas do luns 18. Este lume, que entrou en Galicia desde Castela e León, afectou finalmente unha superficie de 5.300 hectáreas, das cales 5.125 se corresponden con monte raso e as 175 restantes con arborado.

Para a súa extinción mobilizáronse, de xeito acumulado, 10 técnicos, 59 axentes, 102 brigadas, 42 motobombas, 4 pas, 13 helicópteros e 11 avións.

Extinguido Vilardevós-Vilar de Cervos: 2.418 ha

Ás 20.16 horas de hoxe quedou extinguido o incendio do concello ourensán de Vilardevós, parroquia de Vilar de Cervos, iniciado o mércores 13 ás 18.09 horas. Finalmente afectou unha superficie de 2.418,71 hectáreas, das cales 1.457,48 se corresponden con monte raso e as 961,23 restantes con arborado.

Mobilizáronse para a súa extinción, de xeito acumulado, 3 técnicos, 23 axentes, 16 brigadas, 15 motobombas, 3 helicópteros e 7 avións.