Aprobados os primeiros orzamentos de Ourense en 5 anos, con abstención do PP

O Concello de Ourense aprobou os seus primeiros orzamentos en 5 anos, desde o 2020, cun valor superior a 116 millóns de euros.

A votación tivo lugar nun pleno extraordinario, onde saíron adiante grazas o voto favorable do grupo de goberno, Democracia Ourensá, e a abstención do PP e a pesar dos votos en contra de PSdeG e BNG.

Tanto nacionalistas como socialistas lamentaron que os orzamentos nacen "sen diálogo nin negociación" e que "carecen de transparencia".

"Vostede fixo o que sempre fai, escorrer o vulto", denunciou o edil do BNG en Ourense Luís Seara.

Seara incide en que a partida orzamentaria parte de "bases de execución leoninas" e que "darán cheque en branco ao alcalde" para "facer o que lle dea a gana" a través de "uns mecanismos de dubidosa legalidade".

Tamén a concelleira socialista Natalia Beneítez expresou a súa "desaprobación", tanto por "o contido" como por "a forma" na que o grupo de goberno municipal tramitou a partida.

Apunta á súa "falta de sensibilidade" e "a súa escasa vontade de participación democrática".

"Ourense necesita orzamentos serios, transparentes e participativos, que cumpran coa legalidade e atendan ás necesidades reais da cidade, estes orzamentos non cumpren nada diso", engadiu Beneítez.

Os populares reiteran que "estes non son" os seus orzamentos porque "non reflicten a forma de atender a política municipal" do PP, pero recalcan que "a cidadanía está farta da inacción dos seus gobernantes".

"Esta cidade non pode seguir paralizada e atrapada en servizos precarios. Tomamos unha decisión, que era a máis difícil e non era a máis cómoda, pero era a máis responsable e necesaria: actuar", trasladou a edil popular Ana Méndez.

Desde o estrado, Jácome tachou de "hipócritas" e "irientes" as acusacións da oposición e sinala que "o que se aproba hoxe aquí" responde á "maioría de concellos de España".

Democracia Ourensá agradece, ademais, ao Partido Popular por "apoios" que "miran pola cidade" e "non son o non polo non".

Alegacións desestimadas

O pleno desestimou as cinco alegacións presentadas por dous particulares, dúas asociacións e a Central Sindical Independente e de Funcionarios (CSIF).

O grupo de goberno aceptou debater unha "futura modificación de crédito" en setembro a pedimento do Partido Popular para responder as demandas dunha das asociacións, a agrupación veciñal Miño, que pedía unha partida destinada a entidades sociais da cidade.

A agrupación de comerciantes da Praza de Abastos nº1 de Ourense non conseguiu que a súa petición de incluír unha partida para rematar as obras do edificio orixinal salga adiante, a pesar do apoio de socialistas e nacionalistas.

"Ponse de manifesto, de novo, a incerteza do goberno local de apoiar a persoas que traballan día a día a prol da economía da cidade", recalcou Natalia Beneítez.