BNG e PSdeG pídenlle á Xunta un cambio no modelo da política forestal

A portavoz nacional do BNG, Ana Pontón, considera que a “preocupante e dramática” situación provocada polos incendios demostra que o modelo forestal do PP está “fracasado” mentres pediu un fondo urxente de 200 millóns para a recuperación ambiental e social das zonas afectadas.

Tras reunirse con representantes do partido este xoves para analizar a situación provocada polos incendios forestais en Galicia, especialmente na provincia de Ourense, Pontón describiu o panorama como unha “catástrofe ambiental e social” xa que, segundo as cifras oficiais, “hai máis de 20.000 hectáreas calcinadas polo lume, hai centos de persoas desaloxadas e vemos pobos enteiros que tiveron que ser evacuados”.

A nacionalista mandou apoio e ánimo aos brigadistas feridos así como a súa solidariedade aos afectados. En todo caso, Pontón remarcou que “a máxima prioridade ten que ser frear esta vaga de incendios” para o que pediu “a maior coordinación, colaboración e cooperación entre todas as administracións”, así como a activación de “todos os recursos necesarios” para extinguir os incendios.

Así mesmo, reclamou que se adopten medidas extraordinarias,” non só a curto prazo, senón tamén a medio prazo” polo que pide á Xunta que, en paralelo á extinción, “traballe xa para poñer en marcha un fondo urxente de recuperación social e ambiental que teña unha dotación mínima de 200 millóns de euros e permita actuar con urxencia unha vez que se apaguen os incendios.

O obxectivo, apuntou a líder do Bloque, é que haxa recursos para reparar as infraestruturas municipais e comarcais afectadas, pero tamén axudar ás persoas que perderon os seus bens neste momento e que se articulen axudas económicas para as explotacións forestais, agrarias e gandeiras.

Lembrou que a Xunta ten “un fondo de continxencias que pode poñer en marcha para este tipo de cuestións” aínda que ademais considerou a conveniencia de que se faga unha modificación orzamentaria posto que todos os anos “quedan centos e centos de millóns sen executar”.

Con todo, Pontón pediu á Xunta e ao PPdeG que asuman a súa responsabilidade, xa que esta vaga de incendios “ten que supoñer un punto de inflexión porque o que non pode ser é que ano tras ano Galicia arda polos catros custados”. “É necesario cambiar as dinámicas”, incidiu a nacionalista que cre que a Xunta debe deixar de esconderse “en teorías falsas e conspiranóicas de tramas inexistentes” porque debe asumir “que os incendios son un grave síntoma da súa política de abandono rural e dunha política forestal fracasada”.

Ao seu xuízo, o “abandono rural” e a “política forestal de monocultivo” é “un cóctel explosivo” que favorece os incendios polo que se deben tomar “decisións que permitan polo mesmo reducir a incidencia” dos incendios. 

Os socialistas galegos tamén pediron un cambio de rumbo na política foresta. O portavoz da executiva do PSdeG, Julio Torrado, insistiu en varias ocasións en que o actual non é o momento adecuado para abordala, pero subliñou que o monte galego adoece dun "problema estrutural" de xestión que tocará abordar en detalle unha vez alíviese a situación.

"Ninguén pode dicir que o que estamos a vivir non era previsible", lamentou, aínda que quixo deixar claro que "é ridículo estar en debate de partidos" neste instante e que o primordial é axudar ao operativo de extinción e mostrar "agarimo e afecto" coas persoas das zonas castigadas polo lume.

Torrado reprochoulle ao presidente do PP, Alberto Núñez Feijóo, o seu "historial" de declaracións controvertidas sobre incendios e recomendoulle "que cale" antes de seguir ampliándoo. "Creo que Feijóo ten un historial sobre incendios, entre declaracións e fotos, que a min persoalmente avergoñaríame", apuntou Torrado, quen  censurou que o líder popular se desprazase onte ata Chandrexa de Queixa para facer valoracións políticas en plena vaga de incendios en Galicia. Na súa comparecencia, o voceiro socialista  "que non veña ninguén a utilizar Galicia como plataforma" para o "debate partidista" nun momento crítico onde o primordial é extinguir os múltiples lumes que afectan á comunidade.