Trump di que comezou a "organizar" unha reunión entre Putin e Zelenski
Este cumio bilateral celebraríase tamén a tres bandas e incluiría unha reunión co propio Trump
O presidente Donald Trump e o presidente Volodimir Zelenski na Casa Branca (Reuters)
O presidente estadounidense, Donald Trump, afirmou que comezou a "organizar" unha reunión entre os seus homólogos ruso e ucraíno, Vladimir Putin e Volodimir Zelenski, tras celebrar un encontro en Washington con este último e varios líderes europeos para tratar de lograr avances para a paz en Ucraína.
"Ao concluír as reunións, chamei ao presidente Putin e comecei a organizar unha reunión, nun lugar por determinar, entre o presidente Putin e o presidente Zelenski", escribiu Trump nunha mensaxe na súa rede social Truth Social.
"Despois desa reunión teremos unha trilateral, na que estarían os dous presidentes e eu mesmo", escribiu.
Trump asegurou que mantivo "unha moi boa reunión" na Casa Branca con "distinguidos invitados" en referencia a Zelenski, o secretario xeral da OTAN, Mark Rutte; a presidenta da Comisión Europea, Ursula von der Leyen; os presidentes de Francia e Finlandia, Emmanuel Macron e Alexander Stubb; os primeiros ministros de Reino Unido e Italia, Keir Starmer e Giorgia Meloni, e o chanceler alemán, Friedrich Merz.
"Durante a reunión abordamos as garantías de seguridade para Ucraína, que serían proporcionadas polos distintos países europeos, en coordinación cos Estados Unidos. Todos estamos moi satisfeitos coa posibilidade de alcanzar a paz entre Rusia e Ucraína", detallou sobre o encontro o magnate neoiorquino.
Ao comezo do encontro multilateral Trump insistiu á súa vez en que era necesario debater o "intercambio de territorios", unha proposta lanzada polo presidente ruso Vladimir Putin durante o seu encontro da semana pasada en Alaska e que implicaría que Ucraína tería que ceder a Rusia a soberanía de rexións como Donetsk e Lugansk.
Kiev dixo que considera intolerable este posible intercambio e que tecnicamente resulta ademais inconstitucional de acordo á Carta Magna ucraína.
Ningún dos participantes nas reunións na Casa Branca pronunciouse sobre a posibilidade de que vaia estar sobre a mesa a posible cesión de territorios ucraínos que controla actualmente o exército ruso.
