Stellantis Vigo fabrica o seu vehículo número 17 millóns
Trátase dunha Opel Combo Electric que se ha vender en Eslovaquia
Unha Opel Combo Electric converteuse este mércores no vehículo número 17 millóns producido na factoría viguesa de Stellantis desde que iniciou a súa actividade no ano 1958.
De cor Azul Kiama, o vehículo millonario está equipado con motor eléctrico de 100 quilowatts (136 cabalos) e unha batería que permite ata 334 quilómetros de autonomía. Ademais, será comercializado en Eslovaquia, segundo anunciou a firma nun comunicado.
A última xeración do Opel Combo prodúcese en Vigo desde o seu lanzamento, en xullo de 2018, sendo o primeiro modelo da marca alemá que se fabrica na Cidade Olívica.
Desde entón e ata a data, saíron das liñas de produción da planta 370.000 unidades dese modelo, o 92% con destino ao mercado internacional. Actualmente fabrícanse cunha cadencia de 150 unidades ao día.
En 2021 comezou a produción da súa versión 100% eléctrica, que representa o 6% da fabricación total deste modelo, e que se ensambla na mesma liña de produción ca as motorizacións térmicas.
O Opel Combo forma parte da saga dos utilitarios lixeiros que fabrica Stellantis Vigo, integrada tamén polos Citroën Berlingo e Berlingo Van, Peugeot Rifter e Partner, Fiat Qubo L e Fiat Professional Doblò.
