Son fiables as críticas na Internet? Pódense comprar e hai quen as usa como chantaxe

Por só tres euros pódense mercar comentarios positivos en Internet para un negocio. Hai empresas que comercian coas críticas, un elemento que se está facendo cada vez máis decisivo para a marcha dun establecemento.

Na Rede atopamos páxinas que ofrecen difundir recensións favorables e que se comprometen a eliminar as negativas. Do outro lado, existen clientes que ameazan con deixar opinións daniñas na rede se non lles dan privilexios nun local ou nun servizo.

É unha práctica moi prexudicial, e relativamente frecuente, en sectores como a hostalaría. Algunhas son críticas sen sentido, que non se ve o mar dende un hotel de Ourense, por exemplo, pero outras buscan un beneficio.

"Din cousas do tipo: 'Vouche pór un mal comentario se non me regalas o aparcadoiro, ou o almorzo ou se non me das unha suite'", conta Miguel Fernández, o director do hotel Axis de Vigo.

Como xa fixeron outros países, España quere cambiar a lei para loitar contra este tipo de publicidade enganosa. O Ministerio de Consumo propón prohibir a compravenda de recensións, obrigar a que se indique se unha crítica está verificada como real e darlles dereito ás empresas para eliminar as opinións falsas.

Google, que é a principal referencia na publicación e lectura de recensións, ten normas internas para supervisar os comentarios. Ademais, o  xigante de Internet asegura que conta con equipos que revisan as críticas sospeitosas e as eliminan se non cumpren as condicións.