Silleda cambia as luces de Nadal por adornos feitos por persoas con discapacidade

Batas de papel, perchas ou palés terán unha segunda vida este Nadal en Silleda. Non haberá luces nas rúas, pero si estrelas, árbores e anxos feitos por todos os usuarios deste centro de día e terapia ocupacional.

"É un xeito de poñer en valor o seu traballo. A xente vai quedar sorprendida, teñen moitas capacidades, moitas habilidades e moitas veces non se teñen en conta", explica Iván García, o coordinador do centro de COGAMI en Medelos, na Bandeira.

Inclusión, reciclaxe e aforro eléctrico xúntanse nesta iniciativa que promove o Concello ante a crise enerxética actual.

"Non é tanto o que vaiamos aforrar de enerxía porque coas luces led a iluminación de Nadal tampouco consome moitísimo, pero queremos dar exemplo e unha imaxe ante a veciñanza, as institucións temos que dar o primeiro paso", di Manuel Cuíña Fernández, o alcalde de Silleda.

A nova colleu por sorpresa os veciños que atopamos polas rúas onde se instalarán os arcos coa nova decoración.

Tamén haberá algúns adornos nas 33 parroquias do concello e un concurso fotográfico para que a xente se anime a explorar este Nadal alternativo no centro de Galicia.