Sete comunidades detectaron casos sospeitosos de varíola do mono

A Sociedade Española de Viroloxía reúne a súa directiva no concello ourensán de Esgos, tras dous anos sen xuntanzas presenciais por mor da pandemia. Hoxe, outro virus, o da varíola do mono, mantén en alerta as autoridades sanitarias. Galicia, Euskadi, Castela-A Mancha e Estremadura detectaron nas últimas horas casos sospeitosos.  Xa son sete as autonomías que investigan posibles infeccións. O virólogo Juan García explica que a situación non é comparable cos contaxios de coronavirus.

"Tranquilidade. Este virus transmítese por contacto, o coronavirus transmítese por medio de vías respiratoria, por aerosois, como a gripe, por tanto non existe esa difusión masiva porque é necesario tocarse, ter un contacto íntimo para poder contaxiarse . Non é un virus de transmisión sexual, é un virus que se pode transmitir se temos un contacto sexual. É algo que hai que ter claro".

Sanidade recomenda o illamento baixo vixilancia médica dos casos confirmados e dos sospeitosos ata que desaparezan as lesións na pel, e aconsella o uso de máscara cirúrxica. Os expertos consideran que as medidas permitirán cortar a transmisión e descartan unha epidemia.
 

"Eu creo que a OMS debera intentar lexislar de forma que houbese controis exhaustivos, de todo ese tráfico de animais e desa forma de producir masiva. Loxicamente os países máis afectados son os menos receptivos a aceptar normas. É moi difícil que convenzas unha poboación en subdesenvolvemento que non coma o mono, porque é a súa comida".

Descoñécese de momento cal foi o paciente cero en España con dous grandes focos localizados: un nun establecemento de Madrid que foi clausurado e un segundo unha festa multitudinaria en Gran Canaria á que asistiron preto de 80.000 persoas.