Sergas Prof, a nova app ao servizo da teledermatoloxía
A aplicación permite facer fotos de lesións cutáneas co móbil e incorporalas ás historias clínicas
Mellora e axiliza o proceso diagnóstico e terapéutico
As cámaras que permitían facer fotografías dunha lesión cutánea teñen os días contados. A teledermatoloxía dá un paso máis cunha nova ferramenta, a aplicación Sergas Prof.
"Vainos permitir realizar as fotografías dos pacientes cuns dispositivos móbiles propios do Sergas, cunha aplicación propia. Vanse subir estas imaxes directamente á historia do paciente e imos poder xerar a consulta con Dermatoloxía nun mesmo acto e dun xeito moi simple", explica Teresa Ferreiro, subdirectora de Atención Primaria da Área Sanitaria de Compostela.
O seu uso está destinado aos médicos de Atención Primaria que detectan na pel do paciente algún tipo de lesión e buscan a valoración dun dermatólogo.
"Podemos facerlle unha fotografía macroscópica".
Ou ir máis ao detalle utilizando un dermatoscopio. En cuestión de segundos, as fotos de altísima calidade incorpóranse á historia do paciente, unha rapidez que vai ter impacto na práctica clínica.
"Vai simplificar todo o proceso. Será un proceso moitísimo máis eficiente, vai mellorar moito a calidade da información clínica, que é a clave para todo o proceso diagnóstico e terapéutico", engade Ángeles Flores, xefa do Servizo de Dermatoloxía do CHUS.
A versatilidade do teléfono móbil vailles permitir aos facultativos usar esta aplicación tamén na asistencia sanitaria a domicilio.
"Todo isto, unha maior capacidade asistencial, unha maior calidade asistencial", apunta Antonio Gómez Caamaño, conselleiro de Sanidade.
Estase probando en tres centros para identificar melloras e resolver posibles incidencias. A primeiros de ano empezarase a implantar de xeito progresivo no resto dos centros de saúde.
