Tentan roubar por segunda vez en menos dun mes nunha tenda de larpeiradas de Pontevedra

Segundo intento de roubo nunha céntrica tenda de larpeiradas de Pontevedra. A súa propietaria, Nohely Medina, considera que o ladrón é o mesmo porque empregou o mesmo modus operandi que a outra vez, cunha gran pedra bateu nos cristais e logo deixouna no mesmo sitio que no roubo anterior.

Deste segundo intento só quedan unhas rabuñaduras no cristal. Nohely Medina está plenamente convencida de que é o mesmo autor da outra vez porque tamén empregou unha pedra grande para romper o cristal. E deixouna no mesmo sitio.

Da outra vez estima unhas perdas próximas aos 1.000 euros, ademais de renovar a porta e todo o que se perdeu en envíos pola Internet que recibe na tenda.

Considera Nohely que esta zona de Pontevedra precisa máis vixilancia porque están desaparecendo establecementos e os domingos e festivos é moi vulnerable.