Por segunda vez nun mes, un coche cae na curva "trampa" de Cangas

Volveu pasar. A condutora da furgoneta, malia coñecer o trazado, quedou con medio coche fóra. Non é a primeira e temen que non sexa a última.

"O problema é que hai un desnivel da rúa, que está sen valado e sen nada. Ves por aí e, ademais de ser estreito, podes caer se andas despistado, que foi o que lle aconteceu ao coche do outro día".

"O trazado é un pouco raro. É unha curva irregular e tes que ir moi pegadiño á parede porque, como te peches un pouco, podes ir a abaixo co coche".

"Iso é un camiño de carros, non é de coches".

É o segundo coche que cae no mesmo punto nun mes e, aínda menos mal, porque a rúa das Segadas, en Cangas, leva máis tráfico do que poida aparentar e tamén do que pode soportar.

"Aí vive moita xente e para saír á estrada principal hai que saír por aí. Non queda outra".

"Porque dá a volta a dúas rúas e aí enriba hai unha rotonda pequeniña e soen saír ou por un lado ou polo outro".

"Todas as vivendas por aí arriba, todas teñen coche".

Vivendas, o aparcadoiro dun supermercado e vía de servizo dende unha das arterias principais da vila, a avenida de Vigo. Unha calzada de pouco máis de dous metros, na que teñen que convivir coches en dobre sentido con peóns.

Como o fan? Fácil non é.

"É complicado pero é o que hai. Dar marcha atrás e deixar pasar a outro, o que teña preferencia".

"Prefiro non usar este camiño. Aparco no aparcadoiro do supermercado por ser de dobre dirección".

A veciñanza pide medidas antes de que pase algo máis grave.

"Hai que ampliar o terreo, poñer dirección única e un bordillo".

Curiosamente, póñenlle voz ao problema os que están de paso, porque os que viven ao pé da curva padéceno, pero confesan que xa lle teñen collida a medida.