Santiago esixe aos Franco que se fagan cargo do traslado ata Compostela das estatuas do Mestre Mateo

O Concello de Santiago esixiu á familia Franco que se faga cargo do traslado das estatuas atribuídas ao Mestre Mateo ata Compostela. Así o anunciou nunha conferencia de prensa este luns a alcaldesa, Goretti Sanmartín, quen advertiu de que, no caso de que a resposta sexa negativa, "reclamaranse as cantidades do traslado".

Nunha comparecencia ante os medios, Sanmartín explicou que o Concello respondeu a un burofax da familia Franco para demandar que se responsabilice do traslado, xa que, segundo indicou, os servizos xurídicos entenden que esa é a interpretación da sentenza e que deben restituír as esculturas.

Neste contexto, subliñou que, unha vez que a familia Franco asumiu a condena imposta polo Tribunal Supremo para restituír as figuras, "o Concello iniciou os contactos para dispoñer do necesario para o seu traslado e depósito no lugar máis adecuado".

Deste xeito, contactouse coas direccións responsables de Memoria, de Patrimonio e tamén coa Dirección Xeral de Patrimonio da Xunta, que mostraron a súa "disposición para colaborar nunha operación tan delicada".

Neste sentido, a rexedora anunciou que, de maneira provisional, proponse o Museo do Pobo Galego como sede para albergar as esculturas na súa volta a Compostela. Segundo defendeu, trátase dun espazo público, visitable e, sobre todo, "referente da identidade colectiva do país".

"Conta coas condicións técnicas e museísticas adecuadas para coidar deste ben patrimonial e, ademais, hai un elemento que eu creo que non é menor, e é que en este mesmo museo está depositada outra peza relacionada directamente coas estatuas", lembrou.

Así, referiuse a unha terceira estatua, a lauda sepulcral do século XIV, e que foi adquirida polo Concello xunto coas estatuas dos profetas. Nesta liña, indicou que tamén se tivo en conta que estas figuras "volvan" ao Concello, ao regresar a un inmoble de propiedade municipal.

Con todo, anunciou que o Padroado do Museo do Pobo Galego xa manifestou formalmente a súa disposición para acoller estas obras de arte. Consultada sobre o "recibimento" que debe facerse a estas figuras, a rexedora mostrouse convencida de que "moitísima xente" quererá ver como "volven á casa unhas estaturas que nunca deberon irse".

Sobre o prazo de resposta da familia Franco, Sanmartín insistiu nesta debería darse "ao longo deste mes de xullo", un tempo que cualificou de "prudencial".

A continuación, fixo fincapé en que de momento non recibiron unha resposta por parte dos Franco, pero sinalou que hai dúas fórmulas posibles.

Segundo detallou, unha das posibilidades é que digan que se se fan cargo do traslado e, no caso de que non o fagan, "será o propio Concello quen o faga, para despois reclamar xudicialmente esas cantidades á familia".