Dez esculturas de Manolo Paz locen entre os rañaceos de Manhattan
A mostra ao aire libre poderá verse ata o mes de setembro na emblemática Park Avenue
As pezas evocan Galicia nas formas e nos materiais
O escultor Manolo Paz inaugura en Nova York a súa exposición 'A distancia que une', dez pezas monumentais que conectan o rural galego coa capital do mundo, nunha mostra que ocupará unha das arterias máis emblemáticas da cidade ata o vindeiro mes de setembro.
O escultor regresa a Nova York, a cidade que o acolleu en distintos momentos da súa carreira artística. Nesta ocasión presenta unha exposición de 10 esculturas que se integran na selva de cristal e cemento de Park Avenue. Pezas como "Catedrais", feitas con láminas de cuarcita; e "Nasas", cubos de reixa inspirado no aparello dos mariñeiros coas cores das bandeiras estadounidense.
Poderán verse entre as rúas 60 e 63 ata o 30 de setembro, grazas a The Fund for Park Avenue, a galería Max Estrella e coa colaboración da Xunta.
