Weinstein condenado a 15 anos, tras repetirse o xuízo, pola agresión sexual a súa exasistente

Un xuíz de Nova York impuxo este mércores unha pena de 15 anos de prisión ao outrora poderoso produtor de Hollywood Harvey Weinstein polo cargo de agresión sexual en primeiro grao, polo que foi declarado culpable o ano pasado, despois de ser acusado pola exasistente de produción Miriam Haley de obrigala a practicarlle sexo oral en 2006.

Weinstein, de 74 anos, pediu desculpas e escoitou a sentenza desde a súa cadeira de rodas. O produtor enfrontábase a unha pena de ata 25 anos de prisión por este delito.

Xa fora condenado en 2020 pero revogouse a resolución

En 2020, Weinstein foi condenado en Nova York tras un xuízo no que Haley e outra muller acusárono de agredilas sexualmente en 2006 e 2013, respectivamente, pero esa condena foi revogada posteriormente por un tribunal de apelacións ao considerar que se cometeran erros procesuais.

A acusación de Haley volveu levar a Weinstein a xuízo o ano pasado, cando foi declarado novamente culpable.

Ao impoñerlle a condena, o maxistrado afirmou que aínda que Weinstein será lembrado polas súas numerosas películas, iso contrastará "co que fixo, co que se converteu: un depredador sexual, o rostro literal do movemento #MeToo".

Antes de que se ditase a sentenza, Weinstein escoitou na sala á Fiscalía, que solicitara para el unha pena de 20 anos de prisión e outros cinco en liberdade condicionada. A fiscalía agradeceu a Haley a súa "valentía e tenacidade" e afirmou que Weinstein nunca mostrara remordemento e "négase a aceptar a responsabilidade por este delito".

As accións do produtor de Hollywood son unha "ameaza para a sociedade"

Os fiscais dixeron que as súas accións representan unha "ameaza significativa para a sociedade" e que é necesario un escarmento para evitar que outras figuras poderosas tamén fagan o mesmo, abusando do seu poder, de acordo con CBS News.

Tamén se escoitou á vítima, Miriam Haley, quen dixo ao xuíz que non esperaba ter que revivir denovo o ocorrido, tras transcorrer seis anos do primeiro xuízo.

A vítima, diagnosticada de trastorno de tensión postraumática

Asegurou que a agresión sexual de que foi obxecto afectou a súa confianza tanto no eido profesional como no privado. Dixo que o ocorrido en 2006 seguía sendo un segredo escuro e doloroso e que foi diagnosticada de trastorno de tensión postraumática (TEPT). Lembrou que se enfrontou a un acoso cibernético e que o equipo legal do acusado a ridiculizó e que a seguiron investigadores privados, engade CBS.

A última quenda, previo á condena, foi para Weinstein, quen pediu desculpas "sinceramente a quen puidese ferir" coas súas accións e acto seguido reiterou a súa inocencia.

"Sinto verdadeiro remordemento por Miriam Haley", asegurou ao xuíz antes de que ditase sentenza. Engadiu que aínda que o exproductor, ao que diagnosticaron varias enfermidades, xa non representa unha ameaza física, segue sendo un depredador sexual.

Alén desta condena, Weinstein cumpre desde 2022 outra condena de 16 anos por violación e agresión sexual en Los Ángeles.