Os Estados Unidos anuncian que acollerán a Flávio Bolsonaro tras fugarse do Brasil
"Quen sae ás agochadas do seu país, algo debe", di o presidente Lula
Bolsonaro fuxiu tras perder as eleccións ao pesar sobre el acusacións de lavado de diñeiro e ter aberta outra investigación sobre financiamento irregular
A Policía Federal brasileira anulara ademais os seus pasaportes e o Supremo ordenou investigar o posible financiamento estranxeiro da súa campaña electoral
A Administración do presidente Donald Trump anunciou este martes que acollerá a Flávio Bolsonaro e á súa familia en Estados Unidos despois de que este abandonase Brasil tras ser derrotado nas eleccións presidenciais fronte a Luiz Inácio Lula da Silva.
"O Departamento de Estado expedirá visados a Flávio Bolsonaro e aos seus familiares e permitiralles entrar en Estados Unidos", declarou á prensa un alto cargo da Administración baixo condición de anonimato.
O senador ultradereitista poderá entrar en territorio estadounidense malia que a Policía Federal brasileira cancelou este martes os seus pasaportes ordinario e diplomático, despois de que incumprise a orde xudicial de entregalos no marco dunha investigación por presunta corrupción.
O anuncio produciuse despois de que aliados de Bolsonaro asegurasen que o candidato derrotado tomara un voo con destino a Estados Unidos, segundo informaron medios brasileiros como O Globo e Folha de São Paulo.
O luns, un día despois de perder as eleccións fronte a Lula, Flávio Bolsonaro recibiu a orde xudicial de entregar os seus pasaportes nun prazo de 24 horas, ademais da prohibición de abandonar o país.
A decisión foi ditada polo xuíz do Tribunal Supremo Alexandre de Moraes, quen tamén estivo á fronte do proceso no que Jair Bolsonaro, pai de Flávio e expresidente brasileiro, foi condenado a 27 anos de prisión por intento de golpe de Estado.
Flávio Bolsonaro está a ser investigado polo Supremo nunha causa por presunto branqueo de capitais, segundo os diarios O Estado de S. Paulo e O Globo.
O senador perdeu a segunda volta das eleccións presidenciais co 48 % dos votos, fronte ao 52 % obtido por Lula, uns resultados que o dirixente ultradereitista cuestionou durante a noite electoral.
Trump, aliado político da familia Bolsonaro, afirmou este martes que as eleccións brasileiras foron "fraudulentas", aínda que, ao ser preguntado sobre se tomaría algunha medida ao respecto, respondeu que el non goberna Brasil.
Eduardo Bolsonaro, irmán de Flávio e exdeputado, permanece en Estados Unidos, onde se instalou tras declararse vítima dunha persecución xudicial.
"Quen sae ás agochadas do seu país, algo debe", di o presidente Lula
O presidente brasileiro, Luiz Inácio Lula da Silva, afirmou este martes que "quen non debe, non teme", polo que "quen sae ás agochadas do seu país, algo debe", en referencia á fuxida de Flávio Bolsonaro aos Estados Unidos.
"Lamento que marchase do Brasil. Podería quedar para demostrar que as acusacións non son verdadeiras", dixo Lula sobre o seu rival derrotado nas eleccións do domingo, durante a celebración do seu 81 aniversario, na súa residencia en Brasilia.
