Santiago de Compostela gaña o premio a mellor destino de Calidade de España
Compostela tamén obtivo o segundo posto na categoría de mellor proxecto de mellora de destino Sicted e o terceiro lugar da categoría de mellor actuación
A Secretaría de Estado de Turismo elixiu a cidade de Santiago como mellor destino do Sistema Integral da Calidade Turística Española de Destinos (Sicted), un premio que será entregado o próximo día 19 na Feira Internacional de Turismo Fitur en Madrid.
Avanzouno este xoves o concelleiro de Turismo de Santiago, Sindo Guinarte, e a xerente de Turismo de Santiago, Flavia Ramil, nunha rolda de prensa na que remarcaron que a cidade tamén obtivo o segundo posto na categoría de mellor proxecto de mellora de destino Sicted e o terceiro lugar da categoría de mellor actuación.
O concelleiro valorou que estes galardóns avalan "a evolución do modelo turístico cara a un máis rendible economicamente, xerador de máis e mellor emprego e máis harmónico coa vida local".
