Sanidade chama á doazón de sangue por un descenso nas reservas dos grupos, especialmente no 0- e A-
A próxima semana empezará a segunda fase da campaña de doazón en centros educativos das tres universidades galegas
Os hospitais galegos necesitan preto de 500 doazóns de sangue para poder desenvolver o seu labor asistencial
A Axencia de Doazón de Órganos e Sangue (ADOS) fixo un chamamento á doazón de sangue por un descenso nas reservas dos grupos, especialmente no 0 negativo e A negativo.
Tal e como trasladou a Xunta nunha nota de prensa, a coincidencia dos festivos polo Entroido e as inclemencias meteorolóxicas que atravesan estas últimas semanas, diminuíron a participación da cidadanía, e por tanto, repercutido no estado das reservas de sangue.
Para paliar esta situación, as unidades móbiles de ADOS visitarán máis de 30 municipios galegos, con especial presenza nos centros educativos non universitarios. Por iso, animou os mozos para participar activamente.
Así mesmo, ADOS lembrou que a próxima semana empezará a segunda fase da campaña de doazón en centros educativos das tres universidades galegas.
Con todo, subliñou que nos hospitais galegos necesitan preto de 500 doazóns de sangue para poderen desenvolver o seu labor asistencial.
